21 árs gamall maður hefur játað að hafa skipulagt hryðjuverkaárás á tónleika bandarísku söngkonunnar Taylor Swift í Vín í Austurríki fyrir tveimur árum. Réttarhöld yfir honum og öðrum manni hófust í dag.
Maðurinn, sem gengur aðeins undir nafninu Beran A, var ákærður fyrir hryðjuverk og önnur brot. Hann kom fyrir dóm í morgun og játaði einnig að hafa verið hluti af hryðjuverkasamtökum.
Saksóknarar sögðu lögreglu hafa fundið nánast tilbúna sprengju við húsleit heima hjá manninum. Hann var handtekinn eftir ábendingu frá leyniþjónustu Bandaríkjanna, CIA, skömmu áður en tónleikar Swift áttu að hefjast.
Öllum þrennum tónleikum söngkonunnar í borginni var aflýst í kjölfarið og rúmlega hundrað níutíu og fimm þúsund tónleikagestir sátu eftir með sárt ennið, þar á meðal fjöldi Íslendinga.
Swift sagði það hafa verið mikið áfall að þurfa að aflýsa tónleikunum. Henni hafi verið brugðið vegna hryðjuverkaógnarinnar og mikill ótti hafi gripið hana. Hún kvaðst haldin samviskubiti gagnvart öllu því fólki sem keypti miða á tónleikana en sagðist þakklát stjórnvöldum fyrir inngripið, skárra væri að syrgja tónleikana en fjölda mannslífa.
Þrír menn voru upphaflega handteknir en Beran A var ákærður ásamt öðrum jafnaldra sínum, manni að nafni Arda K. Hann er sakaður um að vera hluti af hryðjuverkahópi sem hafði tengsl við Íslamska ríkið. Saman eru þeir taldir hafa skipulagt fleiri árásir, meðal annars í Mekka, Istanbúl og Dúbaí.
Mennirnir geta átt yfir höfði sér 20 ára fangelsi verði þeir dæmdir sekir. Búist er við að réttarhöldin standi til loka maí.
