Nýjar tölur Landsbankans sýna að neysla Íslendinga færist í auknum mæli úr landi, en ríflega fjórðungur af allri neyslu landsmanna fór fram erlendis í júlí síðastliðnum. Hlutfallið var komið í 26,5% og hefur það aldrei mælst hærra.
Alls jókst kortavelta Íslendinga erlendis um 8,5% að raunvirði á milli ára í júlí. Þessi aukna eyðsla erlendis er hluti af stærri þróun, en frá áramótum hefur mánaðarleg kortavelta landsmanna erlendis aukist um að jafnaði 14% að meðaltali. Á sama tíma hefur kortavelta innanlands dregist saman næstum alla mánuði ársins.
Aukin erlend netverslun vegur þungt
Færri ferðamenn sóttu Ísland heim í júlí en á sama tíma í fyrra, eða sem nemur 3,1% fækkun samkvæmt tölum Ferðamálastofu. Þrátt fyrir það jókst eyðsla erlendra gesta hér á landi um 3,9% á föstu gengi, sem þýðir að hver ferðamaður eyddi aðeins meira en áður. Þegar tekið er tillit til verðbólgu nam aukningin hins vegar einungis 0,8%, sem bendir til þess að gestir hafi greitt hærri upphæðir en fengið svipað eða lítið eitt meira fyrir peninginn.
Áhrif á krónuna og verðbólgu
Þótt erlendir ferðamenn hafi eytt nokkuð meira hér á landi í júlí en í fyrra, varð greiðslukortajöfnuðurinn, munurinn á því sem ferðamenn eyða hér og Íslendingar eyða erlendis, tæpum milljarði minni en á sama tíma í fyrra. Minni afgangur skýrist fyrst og fremst af þessari miklu aukningu á eyðslu Íslendinga erlendis.
Þótt aukin neysla erlendis dragi úr verðbólguþrýstingi innanlands getur hún til lengri tíma litið veikt gengi krónunnar, en gengið hefur þó haldist sterkt fram að þessu.
