Formaður Blaðamannafélags Íslands, Sigríður Dögg Auðunsdóttir, telur að skipulögð herferð hafi verið rekin gegn íslenskum blaðamönnum í kjölfar umfjöllunar um Samherja og svokallað byrlunar- og símamál. Þetta segir Sigríður Dögg í viðtali á RÚV þar sem hún gagnrýnir bæði bloggara og lögreglu harðlega.
Tilefni viðtalsins var nýr listi samtakanna Blaðamenn án landamæra yfir fjölmiðlafrelsi í heiminum, þar sem Ísland færist úr sautjánda sæti í það tólfta. Sigríður Dögg segir það jákvæða þróun og telur aukna ríkisstyrki til fjölmiðla meðal skýringa á bættri stöðu íslenskra fjölmiðla.
Á sama tíma segir hún þó að starfsumhverfi blaðamanna hér á landi hafi harðnað verulega.
Tengir meinta herferð við Samherjamálið
Í viðtalinu rifjar Sigríður Dögg upp rannsókn lögreglu á svokölluðu byrlunar- og símamáli, þar sem sex blaðamenn frá RÚV, Stundinni og Kjarnanum – sem nú heitir Heimildin – fengu stöðu sakborninga.
Á meðan Páll Steingrímsson skipstjóri var meðvitundarlaus vegna byrlunar komust einkagögn úr síma hans í hendur blaðamanna. Stundin og Kjarninn birtu samræmdar fréttir um svokallaða skæruliðadeild Samherja og vísuðu í einkagögn skipstjórans. Málið snerist meðal annars um hvernig gögnin úr síma Páls bárust fjölmiðlum eftir að hann varð fyrir byrlun.
Sigríður Dögg telur að í kjölfar þeirrar umfjöllunar hafi farið af stað markviss ófrægingarherferð gegn blaðamönnum sem tengdust bæði Samherjamálinu og Namibíumálinu.
„Það er fólk bara nánast í fullu starfi við að skrifa einhverjar bloggfærslur til þess að halda uppi svona áróðri Samherja og svona fólki þeim tengdum og svona níða skóinn af þeim blaðamönnum sem að fjölluðu um Samherjamálið á sínum tíma og skæruliðamálið,“ sagði hún í viðtalinu.
Segir lögreglu hafa tekið þátt
Formaður Blaðamannafélagsins lét einnig þung orð falla um aðkomu lögreglu að málinu og sagði rannsóknina sjálfa hafa verið hluta af þeirri herferð sem blaðamenn hafi orðið fyrir.
„Við sjáum nú hvernig lögreglan tók þátt í þessari herferð með bara mjög skammarlegum og bara óafsakanlegum hætti,“ sagði hún.
Hún telur jafnframt að með rannsókninni hafi stjórnvöld gengið of langt gagnvart fjölmiðlum og brotið gegn tjáningarfrelsi blaðamanna.
Segist sjálf hafa orðið fyrir „subbuskap“
Sigríður Dögg segir að hún hafi sjálf orðið fyrir mikilli gagnrýni og persónulegum árásum þegar hún tjái sig opinberlega um mál tengd Samherja eða Namibíumálinu.
„Ég hef nú bara fengið að finna það á eigin skinni að í hvert sinn sem ég lyfti penna eða segi eitthvað um Samherja eða skæruliðamálið eða Namibíumálið eða hvað sem því tengist þá fæ ég bara holskeflu af einhverjum subbuskap yfir mig,“ sagði hún.
Hún bætti við að slíkar árásir væru orðnar fyrirsjáanlegar í hvert sinn sem fjallað væri um ákveðin mál eða ákveðna aðila.
Umdeild ummæli
Ummæli formanns Blaðamannafélags Íslands munu án efa vekja athygli, enda sakar hún bæði bloggara og lögreglu um að hafa tekið þátt í skipulagðri herferð gegn blaðamönnum vegna umfjöllunar um eitt umdeildasta fjölmiðlamál síðari ára á Íslandi.
Í viðtalinu fór hún þó ekki nánar út í hvaða einstaklingar eða bloggsíður hún átti við né heldur hvaða aðgerðir lögreglu hún telur hafa farið yfir mörkin.
