Rúmur helmingur Íslendinga telur efnahagsstöðuna hér á landi vera slæma, eða 55%. Þar af segja 12% stöðuna mjög slæma en 43% segja hana frekar slæma. Þetta sýna niðurstöður nýrrar könnunar frá Maskínu.
Frá því á sama tíma í fyrra hefur þeim fækkað sem telja efnahagsástandið gott. Í nýjustu könnun Maskínu töldu 45% stöðuna góða en í fyrra var hlutfallið 63%. Landsmenn líta efnahagsstöðuna þó bjartari augum í dag en árin 2024 og 2023.
Fleiri karlar en konur telja efnahagsástandið gott. Það gera tæp 48% karla samanborið við tæp 41% kvenna. Þá telja þau sem eldri eru stöðuna betri en þau yngri. Í elsta aldursflokknum, sem nær til þeirra sem eru 70 ára og eldri, segja 63,5% efnahagsstöðuna góða. Rétt rúmlega helmingur í næstelsta hópnum, 60-69 ára, er sama sinnis. Í öðrum aldurshópum telja um og yfir 40% stöðuna góða.
Viðhorf lítt háð tekjum
Heimilistekjur virðast ekki hafa bein áhrif á viðhorf fólks til efnahagsástandsins.
Jafnmargir í hópi þeirra sem hafa undir 550 þúsund í tekjur og í hópi þeirra sem hafa tekjur á bilinu ein milljón til 1.399 þúsund telja ástandið gott, eða 39%. Þó eru það sýnilega flestir í hópi þeirra tekjuhæstu, sem hafa tvær milljónir eða meira í heimilistekjur, sem telja ástandið gott, eða 56%.
Stjórnarsinnar jákvæðari
Ef horft er til stjórnmálaskoðana telja kjósendur Samfylkingar umfram aðra að efnahagsástandið sé gott, eða 68%. Næst á eftir koma kjósendur Viðreisnar og VG, þar sem um 55% telja efnahagsástandið gott. Áberandi flestir í kjósendahópi Sósíalistaflokksins segja ástandið slæmt, eða 83%. Næst á eftir koma kjósendur Sjálfstæðisflokksins. 72% þeirra segja efnahagsástandið slæmt og það sama gera 68% kjósenda Framsóknar og 66% kjósenda Miðflokksins.
Könnun Maskínu fór fram dagana 8. til 16. apríl 2026. Svarendur voru 992.
