Alvarlegt umferðarslys varð á Jökuldal við Háreksstaðakvísl skömmu fyrir hádegi í dag. Fjórir bílar lentu í árekstri og voru alls átta manns sagðir hafa verið í bifreiðunum.

Samkvæmt tilkynningu frá lögreglunni á Austurlandi barst tilkynning um slysið um klukkan hálf tólf. Fyrstu upplýsingar af vettvangi bentu til þess að einhverjir þeirra sem lentu í slysinu væru alvarlega slasaðir.

Mikill viðbúnaður var vegna slyssins og voru viðbragðsaðilar þegar í stað boðaðir á vettvang. Þar á meðal voru sjúkralið, björgunarsveitir, lögregla og Rauði krossinn. Þá var þyrla Landhelgisgæslunnar kölluð út.

Vegna umfangs slyssins var hópslysaáætlun virkjuð.

Vegurinn um Jökuldal hefur verið lokaður á meðan viðbragðsaðilar vinna á vettvangi og er ökumönnum því ekki fært um svæðið að svo stöddu.

Lögreglan segir ekki unnt að veita frekari upplýsingar um slysið á þessu stigi.