Vélstjórar, varðstjórar, nefndarmenn, flugvirkjar og eftirlitsmenn eru meðal hæst launuðu ríkisstarfsmanna. Fjármálaráðherra segir telja að flestir hinna hálaunuðu séu í meira en heilu starfi. Það sé hvorki gott fyrir viðkomandi né þjónustuna.
2011 ríkisstarfsmenn voru með meira en eina og hálfa milljón króna í heildarlaun á mánuði frá apríl í fyrra til mars í ár samkvæmt minnisblaði að beiðni efnahags- og viðskiptanefndar Alþingis frá fjármálaráðuneytinu.
Forsetinn er í 20. sæti og næsti embættismaður í röðinni er forsætisráðherra í 179. sæti með tæpar 2,9 milljónir á mánuði. Fyrir ofan forsætisráðherrann eru meðal annars læknar, flugstjórar, flugvirki, hjúkrunarfræðingur, héraðsdómstjóri, forseti Hæstaréttar og forstjóri Landspítalans.
Fjöldinn kom fjármála- og efnahagsráðherra á óvart:
„Já, ég verð nú að viðurkenna að þetta kom aðeins á óvart. Nú hef ég sjálfur verið ríkisstarfsmaður býsna lengi og ég hef aldrei komist í þennan hóp fyrr en núna.“
Há laun greidd hjá Landhelgisgæslunni
Tæpur helmingur á hálaunalista er starfsmaður á sjúkrahúsi eða heilbrigðisstofnun eða 958 af 2011. Þar af starfa 632 á Landspítalanum. Spítalinn er líka langfjölmennasti vinnustaður landsins með um sjö þúsund starfsmenn þannig að innan við einn af hverjum tíu starfsmönnum er með hærri laun en eina og hálfa milljón á mánuði.
„Það er alveg ljóst að launakjörin sem bjóðast eru mjög góð.“
Flestir hjá öðrum stofnunum en heilbrigðisstofnunum á listanum eru hjá Landhelgisgæslunni og Háskóla Íslands, 67 á hvorum stað. Reyndar er sá hæstlaunaði hjá HÍ með 2,4 milljónir á mánuði í laun en 21 hjá Gæslunni er með hærri laun en það. Og sá hæsti þar er með 4,6 milljónir á mánuði.
Margir framhaldsskólakennarar með meira 1,5 miljón á mánuði
Fjölmargir starfsmenn framhaldsskóla eru með meira en eina og hálfa milljón á mánuði í heildarlaun. Þeir eru samtals 139, langflestir þeirra eru framhaldsskólakennarar. Í Fjölbrautaskólanum í Breiðholti er 31 með meira en eina og hálfa milljón króna á mánuði. Í Fjölbrautaskólanum við Ármúla eru þeir 20, þar af er einn framhaldsskólakennari með rúmar 2,2 milljónir á mánuði. Í Fjölbrautaskólanum á Suðurnesjum, Fjölbrautaskólanum á Norðurlandi vestra og Borgarholtsskóla eru þeir líka margir. Hinir hefðbundnu menntaskólar, ef svo má segja, komast vart með tærnar þar sem þessir skólar hafa hælana.
Ekki gott fyrir þjónustuna eða einstaklinginn
„Ég held að í flestum tilfellum þar sem að er um mjög háar launasummur er að ræða er um að ræða fólk sem er í meria en heilu starfi. Og þetta er eitthvað sem við þurfum að skoða. Þetta er ekki gott fyrir einstaklinginn. Þetta er ekki gott fyrir þá þjónustu sem við erum að veita. Þannig að það stingur örlítið í augun þegar að augljóslega er um að ræða meira en heilt starf,“ segir fjármála- og efnahagsráðherra.
