Héraðsdómur taldi lögreglu ekki hafa sýnt nægilega fram á að maður, sem sagðist hafa verið fjölmiðlamaður um borð í Bandero, væri skipverji eða hluti af áhöfninni.
Þetta kemur fram í úrskurði Héraðsdóms Reykjavíkur sem Lögreglustjórinn á höfuðborgarsvæðinu kærði til Landsréttar. Landsréttur vísaði málinu frá 7. ágúst.
Maðurinn var einn þeirra 21 sem voru um borð Bandero, skipi Paul Watson-samtakanna, þegar Landhelgisgæslan og sérsveit ríkislögreglustjóra tóku yfir stjórn skipsins í lok júlí.
Honum var upphaflega gert að halda sig í skipinu á meðan málið væri rannsakað, líkt og hinum sem voru um borð.
Maðurinn kærði þá ákvörðun til Héraðsdóms Reykjavíkur. Hann sagðist vera sjálfstætt starfandi fjölmiðlamaður og að hann hefði verið á skipinu til að fylgjast með aðgerðum skipsins, skrásetja þær og miðla fréttum. Í gögnum málsins var hann skráður sem fjölmiðlamaður ásamt sex öðrum.
Landsréttur vísaði kærunni frá
Í dómnum þótti það ekki sannað að fullu að maðurinn hefði eingöngu verið um borð sem fjölmiðlamaður. Á sama tíma taldi Landsréttur lögreglu þó ekki hafa sýnt nægilega fram á að hann væri skipverji eða hluti af áhöfninni. Þá lá ekki fyrir hvort eða hvernig hann hefði sjálfur tekið þátt í aðgerðum skipsins.
Héraðsdómur felldi ákvörðun lögreglu úr gildi 4. ágúst en þar kom fram að of íþyngjandi væri að gera manninum að halda sig um borð í skipinu í fjórar vikur.
Í kjölfarið breytti lögregla ákvörðun sinni gagnvart öllum sem voru um borð í Bandero. Þeim var leyft að fara frá skipinu en gert að halda sig innan höfuðborgarsvæðisins og tilkynna sig daglega á lögreglustöðina á Hverfisgötu.
Lögregla kærði engu að síður úrskurð Héraðsdóms til Landsréttar og krafðist þess að hann yrði felldur úr gildi. Landsréttur vísaði kærunni frá.
