Sigurður Már Jónsson skrifar:

Það var sláandi að hlusta á viðtal við Sigurlínu Guðmundsdóttur í Brotkast-hlaðvarpinu fyrir stuttu. Þar segir Sigurlína frá sambandi sínu við palestínskan hælisleitanda sem hún kynntist árið 2022, hjálpaði að komast til Íslands og giftist síðar, bæði samkvæmt íslömskum sið og síðar borgaralega í Danmörku en þar bjó hún áður en þau kynntust. Það sem byrjaði sem ástarsaga þróaðist hins vegar með dramatískum hætti þegar stríðið milli Ísraels og Hamas hófst þann 7. október 2023. Samkvæmt Sigurlínu breyttist allt þann dag en þá kom í ljós að hún var gift Hamas-liða.

Í viðtalinu lýsir Sigurlín því hvernig hún og íslenskt samfélag eru misnotuð af mönnum sem eiga ekkert erindi hingað til lands. Hún virkar einlæg og trúverðug í frásögn sinni og því vekur athygli að viðtalið telst ekki fréttnæmt hjá stærri miðlum landsins. Um það ríkir undarleg þögn þó að frásögn Sigurlínar afhjúpi alvarleg mistök í stjórnsýslu og reyndar einnig alvarlegan öryggisbrest í landamæra- og útlendingaeftirliti landsins. Það væri undarlegt ef löggæsluyfirvöld landsins brygðust ekki við þeim upplýsingum sem komu fram í viðtalinu. Það þarf ekki að taka fram að mikil umræða er um málið meðal almennings á samfélagsmiðlum þar sem nafn mannsins hefur komið fram enda er hann sjálfur mjög virkur á þeim vettvangi.

Þjálfaður sem leyniskytta hjá Hamas

En rifjum upp frásögn Sigurlínar af því sem gerðist á heimili hennar í kjölfar blóðbaðs Hamas í Ísrael 7. október 2023. Hún lýsir því þannig að þegar hún kom heim úr vinnu hafi eiginmaður hennar setið fyrir framan sjónvarpið, horft á beina útsendingu frá árásunum og fagnað því sem var að gerast. „Hann stóð þarna og hoppaði af kæti,“ segir hún í viðtalinu. Um leið viðurkennir hann fyrir henni að hann sé Hamas-liði og öll fjölskylda hans tengd samtökunum. Í kjölfarið sagði eiginmaður hennar frá tengslum sínum við Hamas.

Sigurlín segir hann hafa lýst því að öll börn á Gaza fái herþjálfun hjá Hamas, bæði strákar og stelpur, og að hann sjálfur hafi verið sérþjálfaður sem leyniskytta. Það kemur heim og saman við dauðakúltúr Hamas sem hefur verið fjallað um hér í pistli.

Síðar hafi hann einnig sagt henni að hann hefði starfað sem tæknimaður í göngum Hamas á Gaza. „Hann sagðist í raun bara vera Hamas-liði,“ sagði Sigurlín sem segir manninn enn vera staddan á Íslandi þrátt fyrir að hafa fengið brottvísun.

Einn margra Hamas-liða hér á landi

Í viðtalinu segist Sigurlín einnig hafa áttað sig á því í kjölfarið að vinir og félagar mannsins hér á landi væru einnig tengdir samtökunum. „Það er bara alveg bókað mál. Það er hópur af Hamas-liðum á Íslandi,“ segir hún. Hún segist hafa þagað um þetta af skömm og ótta á sínum tíma. „Ég vildi ekki vera að hræða fólk með því að ég væri með Hamas-liða inni á heimilinu mínu.“

Sigurlín heldur því einnig fram að fjármunir sem safnað var hér á landi fyrir fjölskyldu eiginmannsins á Gaza hafi að hluta ratað til þekkts Hamas-liða. Hún segist hafa komist að því eftir að hafa fundið glósur á arabísku þar sem fram kom hvert peningarnir fóru.

Maðurinn hafi safnað fé meðal almennings á Íslandi með opnum hætti á Facebook, undir þeim formerkjum að aðstoða fjölskyldu sína vegna stríðsins. Beningarnir fóru þess í stað til að kaupa vopn og styðja stríðsrekstur Hamas.

Fór frá honum eftir andlegt ofbeldi

Sigurlín dregur ekkert undan í frásögn sinni þegar hún lýsir samskiptum sínum við manninn. Eftir að hann fékk vinnu hér á landi segir Sigurlín að hegðun hans hafi gjörbreyst. Hún lýsir andlegu ofbeldi, stjórnsemi og að hann hafi hakkað síma hennar og tölvu. Um leið hafi hann farið að stjórna hvernig hún klæddist, hvaða myndir væru á samfélagsmiðlum hennar og hvernig hún hagaði samskiptum sínum við aðra.

Sigurlín segir reynslu sína hafa gjörbreytt sýn sinni á bæði íslam og innflytjendamál en hún hefur yfirgefið íslam og snúið aftur til kristinnar trúar. „Ég vona að fólk fari að átta sig á hvers lags fólki við erum að hleypa hingað inn,“ segir hún.

Sigurlín segir að maðurinn hafi sótt um síðasta dvalarleyfi sitt á grundvelli þess að skortur væri á vinnuafli hér á landi en fengið synjun. „Hann fékk synjun á því í febrúar og honum var gert að yfirgefa landið fyrir mars, allavega, og hann er enn þá hérna og hann er enn þá að skrifa opinberlega og hvers vegna er ekki búið að vísa honum úr landi enn þá, ég bara veit það ekki,“ segir hún. Þá bendir hún á að hann hafi sjálfur fjallað um stöðu sína á samfélagsmiðlum og meðal annars greint frá því að hann mætti ekki vinna og ætti yfir höfði sér brottvísun.

Brottvísað en fær að kjósa

Það hlýtur að koma mörgum á óvart að samkvæmt frásögn Sigurlínar hafi maðurinn fengið tilkynningu frá Þjóðskrá um að hann mætti kjósa í sveitarstjórnarkosningunum. „Hann fékk synjun í febrúar og missir þá lögheimili sitt á Íslandi en síðan fær hann bréf inn á Ísland appið sitt fyrir sveitarstjórnarkosningar um að hann megi kjósa í sveitarstjórnarkosningum,“ segir Sigurlín.

Eins og áður segir er frásögn Sigurlínar með þeim hætti að undrun vekur. En ekki síður það skeytingarleysi sem virðist af hálfu fjölmiðla og yfirvalda við henni. Ekki er langt síðan rifjuð var upp hér sú ótrúlega þjónusta sem málflutningur tónlistarkonunnar Möggu Stínu fékk hjá Ríkisútvarpinu. Þögn Ríkisútvarpsins um mál Sigurlínar sýnir augljóslega fréttastefnu ríkisfjölmiðilsins.