Steypubíll sem fór út af brú yfir Þjórsá við Sultartangavirkjun í gærkvöld verður dreginn upp úr ánni í dag. Þetta staðfestir Bryndís Jóhannesdóttir aðalvarðstjóri Lögreglunnar á Suðurlandi. Brúin er lokuð á meðan unnið er að viðgerðum á handriði brúarinnar.
Ökumaðurinn komst upp á hlið bílsins eftir að hann hafnaði ofan í ánni. Hann ofkældist en slasaðist ekki að öðru leyti. Maðurinn hringdi ekki sjálfur á hjálp heldur barst símtalið til neyðarínunnar frá þriðja aðila. Þyrla Landhelgisgæslunnar sótti manninn og var hann fluttur með henni á sjúkrahús.
Ökumaðurinn, sem er starfsmaður Steypustöðvarinnar á Selfossi, var einn á ferð og hafði nýlokið við að steypa, því var tromla bílsins tóm. Ekki er vitað hvað olli því að bíllinn hafnaði ofan í ánni. Lögreglan á Suðurlandi rannsakar nú slysið ásamt rannsóknarnefnd samgönguslysa.
