Þorbjörg Sigríður Gunnlaugsdóttir segir áform ríkisstjórnarinnar um sérstaka brottfararstöð fyrir útlendinga sem fengið hafa synjun um alþjóðlega vernd nauðsynlega til að ná stjórn á kerfinu. Hún hafnar því jafnframt að verið sé að leggja upp með að „fangelsa börn“ og segir fyrirkomulagið í raun mannúðlegra en það sem tíðkast í dag.
Þetta kemur fram í nýju viðtali Frosta Logasonar við Þorbjörgu á efnisveitunni Brotkast.
Þorbjörg segir ríkisstjórnina leggja áherslu á „skýra stjórn“ í útlendingamálum og að stjórnarflokkarnir þrír séu allir sammála um þá stefnu sem nú sé verið að innleiða.
„Ég heyri þetta alveg að þetta sé harðari tónn,“ segir hún í viðtalinu. „Við erum að setja skýrar línur um það hvernig við viljum hafa hlutina.“
Hún segir þó að hertari áherslur stangist ekki á við frjálslynd gildi.
„Þegar við erum að tala um stjórn á landamærum, fyrirsjáanlegar reglur og öryggi í samfélaginu, og svo á hinum endanum að við virðum alþjóðlegar skuldbindingar og stöndum vörð um mannréttindi – þetta eru ekki andstæður,“ segir ráðherrann.
Segir brottfararstöð nauðsynlega
Í viðtalinu er Þorbjörg spurð út í gagnrýni sem komið hefur fram um að með brottfararstöðinni sé meðal annars verið að vista börn í lokuðu úrræði.
Ráðherrann segir umræðuna að hluta byggða á misskilningi og leggur áherslu á að úrræðið verði aðeins ætlað litlum hópi fólks sem hafi fengið endanlega synjun um vernd en neiti að fara úr landi.
„Brottfararstöð er nauðsynleg og við erum eina Schengen-ríkið sem á ekkert svona úrræði,“ segir hún.
Þorbjörg segir langflesta sem fá synjun yfirgefa landið sjálfviljugt með stuðningi stjórnvalda. Brottfararstöðin sé fyrst og fremst hugsuð fyrir einstaklinga sem „segja frá því að þeir ætli ekki að virða ákvarðanir íslenskra stjórnvalda eða sýna það í verki“.
Hún tekur sérstaklega fram að í langflestum tilvikum sé um að ræða „staka karlmenn“.
„Mýkri leið en það sem við gerum í dag“
Þorbjörg segir Ísland nú þegar beita harðari úrræðum en þau sem fyrirhuguð eru með brottfararstöðinni.
Samkvæmt henni sé núverandi framkvæmd sú að foreldrar sem neita að yfirgefa landið séu úrskurðaðir í gæsluvarðhald og vistaðir í fangelsi á meðan börn þeirra séu tekin frá þeim tímabundið á vegum barnaverndaryfirvalda.
„Þetta er mýkri leið en það sem við gerum í dag,“ segir ráðherrann.
Hún segir að í þeim fáu tilvikum þar sem fjölskyldur með börn fari í gegnum úrræðið verði þær vistaðar saman í sérstöku húsnæði eða íbúð þar til brottvísun fari fram.
Segir gagnrýnendur þurfa að svara hvað eigi að gera í staðinn
Þorbjörg segir umboðsmann barna hafa gagnrýnt fyrirhugað fyrirkomulag, en bendir á að stjórnvöld þurfi engu að síður að geta framfylgt ákvörðunum um brottvísun.
„Það mun koma til þess einhvern tímann að það þurfi að brottvísa fjölskyldu frá landinu með barni,“ segir hún. „Spurningin er hvernig gerum við það með mannúðlegasta hætti.“
Að hennar mati þurfi gagnrýnendur einnig að svara því hvaða leið þeir vilji fara í staðinn.
„Ef svarið er að það eigi aldrei að brottvísa neinum sem kemur hingað með barn, þá er það bara annað samtal,“ segir dómsmálaráðherrann að lokum.
Brot úr Spjallinu með Frosta Logasyni má sjá hér að neðan en ef þú vilt sjá allt viðtalið mælum við með áskrift á Brotkast.is
