Framkvæmdasýslan- Ríkiseignir hefur valið tilboð Reita fyrir uppbyggingu hjúkrunarheimilis á Akureyri í útboði sem lauk nýlega. Hjúkrunarheimilið mun standa við Þursaholt 6, verður um 9.100 fermetrar að stærð og verður þar pláss fyrir 140 íbúa.
Þetta kemur fram í tilkynningu frá Reitum sem munu sjá um rekstur húsnæðisins en Ríkiseignir áætla að fela öðrum rekstur hjúkrunarheimilisins.
Reitir vinna hönnun verkefnisins og framkvæmdir í samstarfi við Art-Verk og verður byggingin byggð úr samblandi af forsmíðuðum og forsteyptum einingum.
Slík byggingaraðferð mun gera framkvæmdina styttri, hönnun sveigjanlegri og tryggja gæði húsnæðisins.
Tíu tilboð voru til skoðunar í verkefnið og var tilboð Reita metið hagstæðast.
