Berjatímabilið er hafið og bláberin virðast víða spretta vel. Erfiðara getur þó reynst að krækja sér í krækiber í ár.
Hver á sinn leynistað
Um miðjan ágúst hafa ber víða náð fullum þroska og fólk er farið að leita sér að góðum stöðum til að tína. Margir eiga sér uppáhaldsstað eða jafnvel góðan leynistað.
Í Facebook-hópnum Berjavinum deilir fólk gjarnan upplýsingum um berjalönd. Þegar spurt er um nákvæma staðsetningu á því hvar bestu sprettuna sé að finna er færra um svör. Það getur nefnilega verið svolítið leyndarmál.
Eitt er þó ljóst af umræðunni: víða um land virðist lítið um krækiber að þessu sinni.
„Ég er nú rétt að byrja að skoða þetta af alvöru og mér sýnist þetta koma vel út í ár að mörgu leyti. Það er náttúrlega dásamlegt að vera úti í náttúrunni og vera í berjamó, ekkert yndislegra og það spillir ekki þegar sprettan er eins og núna, kannski svona viku á undan venjulegri tíð. Aðalbláberin og bláberin kannski ekki alveg orðin dísæt en alveg allt í lagi að byrja að tína. Maður verður minna var við krækiberin en oft áður,“ segir Sveinn Rúnar Hauksson, berjaáhugamaður.
Sömu sögu sé að segja um nánast allt land. Bláberin spretti vel en krækiberin síður.
Þannig að fólk þarf bara svolítið að njóta bláberjanna í ár?
„Það er nú ekkert í kotið vísað með það en við munum líka finna krækiber þó að það verði haft meira fyrir því.“
Ef það er kalt, blautt eða vindasamt þegar plönturnar eru að blómstra þá eru býflugur og önnur frævandi skordýr minna á ferðinni
Pawel Wasowicz, grasafræðingur hjá Náttúrufræðistofnun, segir að munur geti verið á bláberja- og krækiberjasprettu milli ára vegna veðurfars. Hafa þurfi í huga að berjalyng blómstri á mismunandi tíma.
„Mestu áhrif veðursins eru yfir blómgunartímann og það þarf að hafa í huga að bláberjategundir báðar eru að blómgast í maí/júní en krækilyngin blómgast í apríl/maí, aðeins fyrr. Ef það er kalt, blautt eða vindasamt þegar plönturnar eru að blómstra þá eru býflugur og önnur frævandi skordýr minna á ferðinni og þá geta verið mjög mikið af blómum en samt myndast tiltölulega fá ber,“ segir Pawel.
