Bandaríkjaforseti hefur í þessari viku hótað að gera árásir á bandamenn í Óman og fyrirskipað að dregið skuli úr hlut Bandaríkjanna í heræfingum í Suður-Kóreu og kallað Kim Jong-un, einhvern harðsvíraðasta einræðisherra veraldar, vin sinn. Hann hafi aldrei sýnt sér annað en virðingu. Trump gaf í skyn að ákvörðunin um heræfingarnar væri vegna þess að stjórnvöld í Suður-Kóreu hefðu ekki stutt árásir Bandaríkjanna og Ísraels á Íran.
Óvinur vina sinna og vinur óvina
Þetta bætist ofan á fjandskap við bandamenn, ítrekaðar yfirlýsingar um yfirráð á Grænlandi, hótanir við grannríkin Kanada, Mexíkó og Panama, skipbrot stefnu Trumps í Mið-Austurlöndum, árásargjarna tollastefnu og margt annað. Nú hótar Trump öllum ríkjum sem eigi í viðskiptum við Íran refsiaðgerðum sem eigi ekki sinn líka. Trump kvaðst við upphaf seinna kjörtímabils síns ætla að verða friðflytjandi og krafðist þess að fá friðarverðlaun Nóbels. Jeremy Bowen, alþjóðaritstjóri BBC, segir að arfleifð hans gæti orðið eilífðarstríð við Íran.
Reiði og vonbrigði
Í umfjöllun BBC kemur fram að ein ástæða fyrir herskáum yfirlýsingum geti verið reiði hans og vonbrigði yfir því að losna ekki út úr átökum við Íran sem hann kaus sjálfur með Ísraelsmönnum að hefja fyrir nærri hálfu ári. Hann viti að þetta stríð auki óvinsældir hans og Repúblikana meðal kjósenda sem styðja það ekki en hann finni enga leið út úr vandræðunum.
Engir kostir nema samningar við Íran
Í Heimsglugganum heyrðist í Jeremy Bowen sem sagði í sjónvarpsfréttum BBC að Donald Trump ætti ekki aðra kosti en að semja við Írani sem hann vill ekki. Íransstjórn myndi útmála slíkan samning sem sinn sigur.
Í rauninni berst hann um á hæl og hnakka, hann stendur frammi fyrir misheppnaðri utanríkisstefnu, svo notað sé eitt af uppáhaldsorðfærum hans. Hann er að reyna að snúa strategískum ósigri sem er að Íransstjórn er enn við völd.
Áhyggjur af arfleifð sinni
Bowen sagði að þeir sem hefðu áhyggjur af stöðu Bandaríkjanna óttuðust að fjandmenn Bandaríkjanna hefðu séð leiðir þar sem þeir gætu notfært sér veikleika Bandaríkjanna. Í sjónvarpsfréttum kvaðst hann telja að Donald Trump hefði áhyggjur af arfleifð sinni sem virtist ætla að verða endalaust stríð við Íran og það vildi hann ekki. Bowen ræddi málefni Mið-Austurlanda í hlaðvarpsþættinum Newscast.
Útlit fyrir að sænska stjórnin missi meirihluta
Í Svíþjóð er allt útlit fyrir ósigur stjórnar hægristjórnar Ulfs Kristerssons í kosningum 13. september. Samkvæmt nýrri könnun sænska ríkissjónvarpsins SVT er tíu prósentustiga munur á fylgi stjórnarinnar og fylgi mið- og vinstriflokka í stjórnarandstöðunni. Fréttaskýrendur segja að engri ríkisstjórn hafi tekist að ná upp svo miklum mun á svona skömmum tíma. Ef úrslitin yrðu eins og könnunin fengju stjórnarflokkarnir bara 153 þingsæti en stjórnarandstaðan fengi 196. Þetta er meðal annars vegna þess að Frjálslyndir (Liberalerna) fengju engan þingmann.
Telur erfitt að brúa bilið
Henrik Ekergren Oscarsson, prófessor í stjórnmálafræði við Háskólann í Gautaborg, segir að erfitt verði fyrir stjórnarflokkana að vinna upp tíu prósentustiga mun. Það þyrfti að fá þau sem hyggjast kjósa flokka til vinstri til að skipta um skoðun og kjósa bláan flokk, slíkt sé með því erfiðasta sem fyrirfinnst í skoðanamyndun. Svo þyrfti að atkvæði allra þeirra sem eru ekki búnir að gera upp hug sinn. Sjöundi hver kjósandi í þessari könnun gefur ekki upp hvað hann ætlar að kjósa, það er meira en ein milljón kjósenda.
Centerpartiet bætir mestu við sig
Mats Knutsson, einn helsti stjórnmálaskýrandi SVT, segir athyglisvert að Miðflokkurinn, Centerpartiet, bæti mestu við sig í könnuninni. Það geti þýtt að margir borgaralegir kjósendur, fólk á miðjunni sem vilji ekki að hægriflokkurinn Svíþjóðardemókratar fái mikil áhrif og taki þátt í ríkisstjórn, laðist að Centerpartiet. Fólk á miðjunni sem vilji kannski sjá rauð-græna stjórn en takmarka áhrif Vinstri-flokksins hyggist einnig styðja Centerpartiet.
Ekki auðvelt að mynda stjórn mið- og vinstriflokka
Mats Knutsson segir að erfitt geti orðið fyrir Magdalenu Anderson, leiðtoga stjórnarandstöðunnar, að mynda stjórn mið- og vinstriflokka. Centerpartiet segi hreint nei við því að Vinstri-flokkurinn fái ráðherraembætti, en sá flokkur hefur gert stjórnarsetu að skilyrði fyrir að styðja Anderson í embætti forsætisráðherra. Að auki séu flokkarnir ósammála í fjölmörgum málum. Anderson þarf að standast mjög, mjög erfitt próf ef henni á að takast að mynda stjórn segir Knutsson.
