Frá og með 16. ágúst verða bakvaktir dýralækna á svæðinu sem nær yfir Sveitarfélagið Hornafjörð, Djúpavog og svæðið suður af honum ómannaðar.
„Matvælastofnun harmar þessa stöðu og vill upplýsa dýraeigendur á svæðinu tímanlega svo þeir geti búið sig undir skerta þjónustu,“ segir í tilkynningu á vef Matvælastofnunar.
Þar segir að þetta megi meðal annars rekja til þess að enginn dýralæknir sé með þjónustusamning við MAST á svæðinu. Engin umsókn hefur borist þótt samningurinn hafi verið laus frá því í mars. Þrátt fyrir ítrekaðar tilraunir hefur ekki tekist að manna bakvaktir með öðrum hætti.
Ekki hægt að ganga að dýralækni vísum
„Eftir 15. ágúst geta dýraeigendur á svæðinu ekki gengið að því vísu að dýralæknir sé á vakt innan svæðisins, hvorki á dagvinnutíma né á kvöldin, nóttunni eða um helgar.
Þurfi dýr á þjónustu að halda getur því þurft að kalla til dýralækni af nærliggjandi svæðum. Ekki er ávallt tryggt að aðrir dýralæknar komist og viðbragðstími getur orðið umtalsvert lengri en dýraeigendur eiga að venjast, ekki síst í bráðatilvikum,“ segir í tilkynningunni.
Dýraeigendum er bent á að hafa samband við dýralækni sem hefur þjónustað þá áður eða aðra starfandi dýralækna.
Matvælastofnun hvetur dýralækna sem gætu hugsað sér að taka stakar bakvaktir á svæðinu að gefa sig fram.
Viðvarandi vandi
Það hefur verið viðvarandi vandamál til margra ára að manna bakvaktir dýralækna.
Formaður Dýralæknafélags Íslands sagði við fréttastofu í júlí að fólk fengist ekki til að ganga vaktirnar, aðallega vegna slæmra launakjara. Það væri ekki tilbúið að fórna einkalífi sínu og fríi fyrir kjörin sem byðust.
„Svo snýst þetta líka um stór vaktsvæði, fáa dýralækna með margar vaktir og starfsskilyrði á svæðunum þar sem þau eru mjög stór og þú þarft að fara yfir mjög langan veg oft til að sinna bráðatilvikum,“ sagði Bára Eyfjörð Heimisdóttir.
