Yfir 2.150 manns voru teknir af lífi í Íran á síðasta ári, tvöfalt fleiri en árið áður. Það segja mannréttindasamtökin Amnesty International vera „ógnvekjandi“ fjölgun sem hefur leitt til þess að skráðar aftökur þar og um allan heim hafa ekki verið fleiri síðan 1981.
Samtökin segjast hafa fengið staðfestar minnst 2.707 aftökur um heim allan árið 2025, sem sé meira en tveggja þriðju aukning samanborið við heildarfjöldann 2024. Þau segjast gruna kínversk stjórnvöld um að lífláta þúsundir ár hvert, þær upplýsingar fara Kínverjar með sem ríkisleyndarmál. Amnesty lítur á Kína sem það ríki sem beitir dauðarefsingum í mestum mæli.
Þróunin sterkust í ríkjum þar sem valdhafar herða tökin
Samtökin segja þróun til harðari refsinga sterkasta í löndum þar sem yfirvöld hafa hert valdatök með því að takmarka athafnir í borgaralegu rými, þagga niður í mótmælum og sýna virðingarleysi í garð þeirrar verndar sem alþjóðleg mannréttindalög og staðlar kveða á um.
Greinilegt sé að klerkastjórnin í Íran hafi tekið að beita aftökum af meiri hörku til að kveða niður andóf í landinu, ekki síst eftir stríðið við Ísrael í júní síðastliðnum. Þau sem líflátin hafi verið tengist mótmælum og hópum sem stjórnvöld banna að starfa.
Harkan hafi aukist aftur eftir mótmælaölduna sem reis í janúar og eftir að Ísrael og Bandaríkin hófu stríð gegn Íran í febrúarlok.
Aftökum hefur einnig fjölgað verulega milli áranna 2024 og 2025 í Sádí Arabíu, Singapúr, Jemen, Egyptalandi og í Kúveit þar sem þrisvar sinnum fleiri voru tekin af lífi í fyrra en árið áður. Fjöldi aftaka fór úr sex í 17 milli ára. Aftökum fjölgaði í Bandaríkjunum, eina ríki Ameríku sem beitti dauðarefsingu árið 2025, þar sem yfirvöld í Flórída fóru mikinn.
