Sólveig Anna Jónsdóttir, formaður Eflingar, vakti hörð viðbrögð á samfélagsmiðlum eftir tvær færslur þar sem hún áréttar andstöðu sína við aðildarviðræður við Evrópusambandið, má segja allt hafi logað eftir að hún mætti á fund ungs fólks gegn ESB í gær þar sem hún flutti meðal annars erindi.
Margir hafa látið hana heyra fyrir þetta, tala sumir um að hún hafi gengið til liðs við auðvaldið og rasista. Þorvaldur nokkur sagði: „Að ganga í lið með rasistum er bara mjög alvarlegt mál og það er ekki skítkast að benda á það. Þetta eru hrikalegar villigötur.“ Sólveig Anna svaraði fullum hálsi: „Segir maðurinn sem vill ganga til liðs við síonistana í Brussel.“
Þá sagði tónlistarmaðurinn Klemens Ólafur Þrastarson: „Vá ljóshært og ungt og með gull í eyrum og með nægan tíma í þetta. Dæmigert Eflingarfólk?,“ sagði hann. „Samherji og MS hafa nú þegar pantað auglýsingapláss gegn aðildarviðræðum fyrir á annað hundrað milljóna króna. Og formaður Eflingar er að berjast með ríkasta fólki Íslands gegn jafnari kjörum. Auðvitað borgar einhver veitingarnar í þessu partýi og það hlýtur að mega spyrja um það.“
Sólveig Anna kannaðist ekki við miklar veitingar eða frían bjór. „Þarna voru engir ókeypis drykkir – það var smá kökubiti í boði.“
Hvern á að sannfæra með skítkasti?
Páll Valur Björnsson, fyrrum þingmaður Bjartrar framtíðar, vitnaði í orð Sólveigar Önnu frá 2021 þar sem hún sagði: „Feðraveldi íslenskrar nýfrjálshyggju snýst fyrst og fremst um að arðræna, kúga og pína verka og láglaunakonur.“ Hann segir:
„Það er frekar sorglegt að sjá þig leiðtoga þessara kvenna vera fallna í heitan faðm þessa feðraveldis. Verði þér að góðu.“
Sólveig Anna svaraði honum líka fullum hálsi: „Þú getur reynt að finna það sem ég sagði um ESB löngu fyrir árið 2021 – agalegt að ég skuli valda karlinum þér vonbrigðum með því að berjast ekki rétt fyrir láglaunakonur.“
Þór Saari, fyrrverandi þingmaður, tók undir með Sólveigu Önnu: „Unga fólkið veit að evrunni fylgir atvinnuleysi og fjármálaráðherra gaf það út að það gerði ekkert til, fólk gæti bara farið til útlanda að leita að vinnu. Þetta lýsir slíkri sín á manneskjuna, lífið og samfélagið að ógeðslegt er að heyra. Hann er beinlínis að segja að fólk sé einskis virði nema sem vinnuafl. Það er bara mjög gott að ungir Íslendingar hafni svona hugsun.“
Sólveig Anna hafði varla undan að svara þannig að hún lét ein skilaboð ganga yfir línuna: „Ég er nú ýmsu vön en þið já-ararnir eruð bókstaflega snar. Hvaða fólk ætlið þið að sannfæra með þessu skítkasti ykkar?“
Mikil og alvarleg hugsanavilla
Hún segir svo í færslu á Facebook í morgun að fjölmennur hópur þeirra sem berjist fyrir Já í atkvæðagreiðslunni 29. ágúst skilji ekki að með því að segja Nei sé þjóðin að fá að ráða í lýðræðislegum kosningum. „Þetta er augljóslega mikil og alvarleg hugsanavilla. Nei-fólk er ekki að beita sér gegn atkvæðagreiðslunni – ætlar þvert á móti að nýta kosningarétt sinn, eins og fólk er yfirleitt hvatt til að gera í aðdraganda kosninga á Íslandi, og taka þátt með því að mæta á kjördag og greiða atkvæði.“
Telur hún að stjórnarflokkarnir hefðu átt að kynna fyrir fólki grundvallaratriði lýðræðis áður en boðað var til atkvæðagreiðslunnar.
Viktor Orri Valgarðsson stjórnmálafræðingur segir þetta alveg rétt hjá Sólveigu Önnu: „Það er fullkomlega málefnalegt og alls ekki andlýðræðislegt að kjósa nei í þessari þjóðaratkvæðagreiðslu,“ segir hann í færslu á Facebook. „Þó svo mér finnist að jafnvel ESB-skeptíkerar ættu að sjá gildi þess að afla frekari upplýsinga um mögulega aðild, til að þjóðin geti tekið upplýstari afstöðu til þess síðar, þá er mjög eðlilegt að þau sem vilja alls ekki aðild, óháð tiltekinni útfærslu aðildarsamnings, vilji ekki að stjórnvöld noti tíma, athygli og vinnu í aðildarviðræður á næstu árum.“
Reynir nokkur sagði. „Staðreyndin er þessi, neiararnir eru ekki að eins neita sjálfum sér um að fá að vita hvað er í boði í samningum við Evrópusambandið heldur eru að reyna að koma í veg fyrir að aðrir fái að sjá hvað stendur til boða. Þetta er í raun aðför að lýðræðinu.“
Alþjóðastjórnmálafræðingurinn Hjörtur J. Guðmundsson sagði þetta minna á ef einhver sem ætlaði að kjósa stjórnmálaflokk saki þá sem ætli ekki að kjósa hann um aðför að lýðræðinu. „Hver og einn kýs væntanlega samkvæmt sinni eigin sannfæringu og ekki annarra. Það er ykkar sem viljið segja já að sannfæra aðra um það sama. Það er ekki verkefni þeirra sem hafa sannfæringu um annað.
Passaðu hvernig sveppi þú borðar
Björn Leví Gunnarsson, fyrrverandi þingmaður Pírata, segir að hann þekki þónokkuð af fólki sem sé almennt á móti ESB en ætli að kjósa Já til að vita hvort skoðun þeirra sé byggð á röngum upplýsingum. „Þarna er gerð hugsanavilla einmitt. „já fólki“ er gerð upp sú skoðun að „nei fólkið“ sé einhvern veginn á móti lýðræðinu. Finndu fyrir mig einn sem er á þeirri skoðun takk,“ segir Björn. Finnst honum það vera þannig að þeir sem segja Nei séu að útiloka eitthvað án betri vitundar.
„Svipað og krakkar sem vilja ekki smakka mat af því að þau halda að hann sé vondur. Svo þegar þau smakka, þá eru niðurstöðurnar annað hvort að maturinn er góður, allt í lagi, eða vondur. Svo, mörgum árum seinna hefur sú skoðun meira að segja breyst af ýmsum ástæðum. Ég borða t.d. sveppi núna en snerti þá ekki þegar ég var krakki.“
Sólveig Anna var fljót að finna dæmi fyrir hann.
„Hér er eitt dæmi: „Er ég að skilja rétt? að stjórn UVG hafi gengið til liðs við Miðflokk-, Framsókn- og Sjálfstæðisflokk í baráttu gegn því að fólk fái að greiða atkvæði um hvort skuli ganga til samninga við Evrópu-sambandið?“. Séð snemma í morgun á Facebook. Ekkert að þakka. Passaðu hvernig sveppi þú borðar.“
Andrea Sigurðardóttir blaðamaður á Morgunblaðinu fann líka dæmi: „Þú baðst um eitt dæmi, þú fékkst fleiri en eitt og þau eru mörg fleiri. Svo gerir þú lítið úr því að það séu dæmi. Píratalegasta hegðun sem ég hef séð.“
