Áslaug Arna Sigurbjörnsdóttir og Rafn Steingrímsson hafa opnað nýja íslenska tilraunavefsíðu, Aithingi.is, þar sem „AI-þingismenn“ líkja eftir störfum Alþingis með því að ræða þingmál, skrifa greinar og greiða atkvæði, án beinnar aðkomu mannfólks.
Verkefnið var kynnt í dag á Facebook síðu Áslaugar Örnu þar sem hún segir markmiðið vera að vekja athygli á því hversu hratt gervigreind hafi þróast og hvaða áhrif tæknin gæti haft á lýðræðissamfélög á næstu árum.
„Á vefsíðunni sem vinnur nú alveg sjálfkrafa skrifa þingmenn greinar og taka til umfjöllunar mál á Alþingi og kjósa um þau án nokkurrar aðkomu okkar,“ skrifar hún.
Samkvæmt kynningunni er verkefnið hugsað bæði sem tilraun og eins konar líkan til að spá fyrir um hvernig þingmál gætu þróast í gegnum Alþingi ef stór gagnasöfn, hegðunarmynstur og pólitískar áherslur væru látin stýra ákvörðunum með aðstoð gervigreindar.
Telur gervigreind geta styrkt löggjafarvaldið
Í umfjöllun Áslaugar segist hún telja að gervigreind geti nýst Alþingi með ýmsum hætti ef tæknin sé notuð af ábyrgð. Þar nefnir hún meðal annars að hægt væri að framkvæma flóknari greiningar á áhrifum lagasetningar, meta fleiri sviðsmyndir og bæta undirbúning þingmála.
Hún bendir jafnframt á að Alþingi reiði sig að miklu leyti á gögn og greiningar frá framkvæmdavaldinu og að gervigreind gæti gert löggjafarvaldið sjálfstæðara í vinnubrögðum sínum.
Að hennar mati gæti slíkt leitt til skilvirkari stjórnsýslu, minni kostnaðar og aukinnar samkeppnishæfni Íslands.
„Við þurfum að ákveða hvernig lýðræðisstofnanir ætla að nota gervigreind,“ skrifar Áslaug og segir samfélög sem tileinki sér tæknina hratt en af ábyrgð muni líklega ná forskoti á önnur á komandi árum.
Á vefsíðunni sjálfri er hægt að fylgjast með því hvernig AI-þingismenn taka afstöðu til mála og hvernig AI-þingi vinnur úr pólitískum upplýsingum og umræðu.
