Meirihluti utanríkismálanefndar Alþingis samþykkti í morgun að afgreiða þingsályktunartillögu um þjóðaratkvæði vegna ESB-viðræðna til seinni umræðu.
Pawel Bartoszek, formaður nefndarinnar, segir að meirihlutinn leggi til að spurningunni verði breytt frá því sem kveðið var á um í fyrstu útgáfu þingsályktunartillögunnar.
„Við leggjum til að spurningin verði: Á að hefja á ný aðildarviðræður við Evrópusambandið? í samræmi við það sem meirihluti stjórnskipunar- og eftirlitsnefndar lagði til.“
Leggja til ítarleg samningsmarkmið
Áfram er stefnt að því að þjóðaratkvæðagreiðslan fari fram 29. ágúst. Pawel segir að meirihluti utanríkismálanefndar leggi til ítarleg samningsmarkmið sem eigi við ef samþykkt verður að halda viðræðum áfram. Þau byggi að mörgu leyti á þeim markmiðum sem voru sett fram þegar sótt var um aðild 2009.
„Við leggjum áherslu á yfirráð okkar á sjávarútvegsauðlindinni og að við fáum áfram að ráða með hvaða hætti hvaða lög gildi um veiðar á Íslandsmiðum og hvernig úthlutun kvóta fari fram, sú ákvörðun verði hér.“
„Varðandi landbúnað þá leggjum við áherslu á það, líkt og síðast, að landbúnaður er lykilpartur af okkar þjóðaröryggi,“ segir Pawel. Hann segir að matvælaöryggi sé hluti af þjóðaröryggisstefnu og því sé haldið til haga að blómlegur landbúnaður haldist áfram ef af aðild að Evrópusambandinu verður.
Ósátt við afgreiðslu úr nefnd
Minnihluti utanríkismálanefndar bókaði mótmæli gegn því að málið væri tekið út úr nefnd. Stjórnarandstæðingar sögðu að enn væru upplýsingabeiðnir útistandandi og að undanfarna daga hefðu umfangsmiklar upplýsingar borist sem lítið svigrúm hefði gefist til að kynna sér.
„Upplýsingarnar hafa borist á meðan þingið hefur ekki verið að störfum vegna sveitarstjórnarkosninga, eins og venja er. Af þeim upplýsingum sem þó hafa borist, bárust þær síðustu í gærkvöld og augljóslega ómöguleiki fyrir nefndarmenn að glöggva sig á þeim innan þess tímaramma.“
