51 af 61 sveitarfélagi landsins leggur hámarksútsvar á íbúana, þar af eru tvö á höfuðborgarsvæðinu.
Útsvarið er stærsti tekjustofn sveitarfélaganna og á síðasta ári voru tekjur þeirra af tekjum og hagnaði íbúanna samtals um 410 milljarðar króna. Hámarksútsvarsprósenta er 14,97% og lágmarkið er 12,44%. Þetta er skilgreint í sveitarstjórnarlögum og sveitarstjórnir þurfa að ákveða fyrir 1. desember hver prósentan verður árið á eftir.
Skattaparadísin Fljótsdalshreppur
Eitt sveitarfélag á Íslandi leggur á lágmarksútsvar, þessi skattaparadís er Fljótsdalshreppur þar sem búa rúmlega hundrað manns.
Tvö af þeim sveitarfélögum sem eru með útsvarið í botni eru á höfuðborgarsvæðinu, það eru Reykjavík og Mosfellsbær. Hafnarfjörður og Kópavogur eru litlu lægri – með 14,93%, Garðabær með 14,71% og Seltjarnarnes er það sveitarfélag á höfuðborgarsvæðinu sem er með lægsta útsvarið: 14,54%.
Hækka, lækka eða standa í stað?
Og það eru skiptar skoðanir hjá oddvitum flokkanna sem bjóða þar fram í sveitarstjórnarkosningunum í vor hvort því verði breytt.
„Við erum stoltir af þessu, að vera lægstir og munum halda því áfram, segir Þór Sigurgeirsson, bæjarstjóri á Seltjarnarnesi og oddviti Sjálfstæðismanna þar í bæ, og aftekur með öllu að útsvarsprósentunni verði breytt og ekki sé ráðlegt að lækka hana.
Í sama streng tekur Skafti Harðarson sem er oddviti Miðflokksins á Seltjarnarnesi. „Ég reikna með að við stöndum ekki fyrir öðru að sinni en að halda því óbreyttu,“ segir Skafti. „Hækkunin, ef við færum upp í fullt útsvar, væri upp á ef mér reiknast rétt til 130 milljónir. Það er ekki sá biti í rekstri sveitarfélagsins að ég vilji taka það úr vösum íbúanna.“
Kristinn Ólafsson er oddviti framboðs Samfylkingarinnar, Viðreisnar og óháðra á Seltjarnarnesi. „Ég held að það sé óhætt að segja að skatttekjur per haus á Seltjarnarnesi séu þær hæstu á landinu,“ segir Kristinn. „Ég held að það sé óábyrgt að segja að við munum ekki gera neitt, við munum allavegana þurfa að skoða málið mjög vel.“
