Í hádegisfréttum ríkisútvarpsins sunnudaginn 28. júní sagði frá því að starfsmenn Paul Watsons-sjóðsins og Paul Watson sjálfur hefðu verið iðnir að pósta á Facebook-síður þennan sama sunnudag upplýsingum og greinum um markmið og yfirstandandi leiðangur sem nefnist aðgerð 86 með vísun í 1986 þegar Paul Watson, sem þá var í samtökunum Sea Sheapard, og félagar hans sökktu tveimur hvalveiðiskipum Hvals hf. í Reykjavíkurhöfn. Paul Watson hefði hlotið mikil viðbrögð við færslum sínum á Facebook-síðu sinni. Nær öll viðbrögðin væru jákvæð. Nokkrir með íslensk nöfn virtust andsnúnir athæfinu.

RÚV sagði að fyrir hádegi hefði Paul Watson svarað á síðunni á íslensku og sagt: Takk fyrir ógnirnar, móðganirnar og skoplegar skoðanir. Með færslunni hefði fylgt samsett mynd af bátnum Bandero, hvölum í fjarska og svo af hópi skeggjaðra karla með íslenskan fána sem steyttu hnefana gegn áhöfn Banderós.

Á skjámynd sem birt er á ruv.is og fylgir hér með sést að íslenski texti Watsons er greinilega ekki saminn af Íslendingi. Textinn er svona: Takk fyrir ógnirnar, móðgunirnar og skoplegar skoðanirnar. Mjög uppskattad.

Í júlí 2024 handtók danska lögreglan Watson í Nuuk á Grænlandi með vísan til rauðrar tilkynningar frá Interpol sem gefin var út af Japan. Stjórnvöld í Japan fóru fram á framsal hans vegna atviks í Suður-Íshafi árið 2010, þar sem hann var sakaður um að hafa hindrað opinbera áhöfn við hvalarannsóknir og valdið skaða á fólki. Watson og lögfræðiteymi hans neituðu ásökununum og héldu því fram að ákærurnar væru af pólitískum toga. Eftir alþjóðlega herferð þar sem frelsis hans var krafist, ákvað danska dómsmálaráðuneytið að framselja hann ekki og honum var sleppt í desember 2024. Í júlí 2025 afturkallaði Interpol formlega rauðu tilkynninguna.

Nú er það ætlun Watsons og félaga hans að hindra lögmætar hvalveiðar við Ísland með valdi. Þeir kenna för sína við árið 1986 og segjast ætla að fullfremja skemmdarverkið sem þá var unnið. Þá var gerð misheppnuð tilraun til að sökkva hvalveiðibátum við bryggju.

Á vefsíðu sinni hefur Watson gortað af því að hafa sökkt allt að 10 skipum:„Við sigldum á (1979) og sökktum (1980) sjóræningjahvalveiðiskipinu Sierra í Portúgal, hvalveiðiskipunum Isba I og Isba II á Spáni árið 1980, Hval 6 og Hval 7 á Íslandi árið 1986, Nybraena árið 1992, Senet árið 1994 og Morild árið 1998, öllum í Noregi,“ sagði í frétt árið 2010 þar sem vitnað var í Watson.

Þessi maður er nú á siglingu innan efnahagslögsögu Íslands. Hann segir að auðkenniskerfi skips síns sé óvirkt og fer ekki að tilmælum landhelgisgæslunnar um að tilkynna ferðir skipsins reglulega. Hann ögrar Íslendingum ekki aðeins með niðrandi ummælum í netheimum heldur hótar öllu illu með valdbeitingu og reynir að fela sig fyrir landhelgisgæslunni.

Enginn veit neitt um framhaldið. Eitt er víst: á vefsíðu stjórnarráðs Íslands hefur ekki birst eitt aukatekið orð um viðbrögð stjórnvalda við þessari atlögu að heiðri og fullveldi þjóðarinnar. Ráðherrarnir vilja fá sæti við borðið innan ESB og það fá þeir ekki nema þeir lúti Paul Watson og öfgum hans. Þetta er augljóst framlag hans í þágu þeirrar kröfu ESB að Íslendingar hætti hvalveiðum. Watson hefði átt að kenna leiðangur sinn við 29.08.26.