Sall Grover hefur óskað eftir leyfi til að áfrýja máli sínu til Hæstaréttar
Alríkisdómstóllinn í Ástralíu komst að þeirri niðurstöðu að Sall Grover hefði gerst sek um mismunun og fyrirskipaði henni að greiða Roxy Tickle 20.000 dali í skaðabætur. Tickle er karlmaður sem var útilokaður frá Giggle, appi Sall sem eingöngu er ætlað konum.
Útilokunin byggði á andlitsgreiningu, sem greindi hann sem karlmann.
Í Bretlandi dæmi Hæstiréttur að kona sé fullorðin kvenkyns einstaklingur í jafnréttislögum landsins og næði ekki yfir karlmenn sem segjast vera eða upplifa sig sem konur. Því er mikilvægt að mál Sall Grover fari fyrir Hæstarétt.
Dómarar í máli Sall Grover gengu svo langt að segja kynvitund æðri kyni. Þegar lög um kynrænt sjálfræði var samþykkt á þingi gerðist slíkt hið sama hér á landi. Sá sem upplifir sig konu hefur heimild til að ganga ínn á stúlkur og konur í baðklefa, byggt á lögum um kynrænt sjálfræði.
Hafði þetta að segja
Catherine Carew, lögmaður með titilinn King’s Counsel og fyrrverandi dómari við Fjölskyldudómstólinn, tjáði sig um málið og sagði að niðurstaðan hafi verið „óvenjuleg valdníðsla.“
Í skoðanagrein sem birtist í The Australian segir Carew:
„Maður situr eftir með þá tilfinningu að dómstóllinn hafi lagt sig fram, umfram eðlileg mörk til að ná fram ákveðinni niðurstöðu.“ Sú niðurstaða er líka gegn lögunum um jafnrétti kynjanna þar sem hvergi er talað um kynvitund sé æðri kyni eins og gerðist í þessum dómi.
„Orðtakið -erfið mál skapa slæm fordæmi- á vel við í þessu máli,“ segir Carew, sem lét af embætti fyrir sex vikum eftir tíu ár sem dómari við Fjölskyldudómstólinn.
Beiðnin um sérstakt áfrýjunarleyfi var lögð fram síðastliðinn föstudag.
Í beiðninni, sem lögð var fram fyrir Hæstarétti, halda lögmenn Grover, málflytjendurnir Ian Neil SC, Leigh Howard og Megan Blake, því fram að Tickle sé ekki kona í skilningi 7D. greinar laga um kynjamismunun (Sex Discrimination Act).
Að sjálfsögðu eru kynin tvö
Móðir náttúra svíkur engan, annað tveggja eru menn svein- eða meybarn við fæðingu, allir fæddir í réttum líkama og kyni sem dugar til dauðadags. Hugurinn eða upplifun er svo allt annars eðlis.
Lögfræðingar Grover halda því fram að ákvörðun hennar um að útiloka líffræðilega karla frá appinu sínu, jafnvel þótt þeir skilgreini sig sem konur, sé „sérstök ráðstöfun“ sem lögin heimila í þeim tilgangi að stuðla að jafnrétti karla og kvenna.
Lesbíur hafa misst rétt sinn til að halda viðburði sem eingönu eru ætlaðar konum, því karlmaður sem segist kona og lesbía hefur nú rétt á að vera á slíkum viðburðum, gegn vilja kvenna. Enginn karlmaður getur verið lesbía, svo því sé haldið til haga.
Lögfræðingarnir færa rök fyrir því að lögin noti hugtökin „karlar“ og „konur“ eingöngu um líffræðilegt kyn einstaklings — það er kyn við fæðingu, sem samkvæmt þeim felur aðeins í sér tvískiptan möguleika. Orðin endurspegli, að þeirra mati, hugtak sem sé frábrugðið hugtakinu „kynvitund.“
Lögin styðji þessa túlkun þar sem þau vísa til kvenna í tengslum við meðgöngu, mögulega meðgöngu og brjóstagjöf, „sem allt eru aðstæður sem einungis konur geta upplifað.“
Helga Dögg Sverrisdóttir
