Tugir voru handteknir um helgina þegar mótmælendum og lögreglu lenti saman fyrir utan varðhaldsbúðir Innflytjendastofnunar Bandaríkjanna, Delaney Hall, í Newark í New Jersey. Hópur fólks sem er í búðunum er í hungurverkfalli vegna ómannúðlegra aðstæðna þar.
Hófu hungurverkfall vegna aðstæðna í búðunum
Mótmælin hafa staðið yfir í rúma viku og stigmagnast. Þau hófust eftir að hópur fólks sem er í búðunum hóf hungurverkfall. Hópurinn birti opið bréf þar sem hann lýsti hörmulegum aðstæðum, meðal annars útbreiðslu sjúkdóma, ormaétnum mat, ónægri heilbrigðisþjónustu og baðherbergjum sem hann sagði ekki mönnum bjóðandi.
Hópurinn viðurkennir að hafa komið til Bandaríkjanna ólöglega en að fólkið hafi upplifað aðstæður sem hafi stofnað lífi þeirra og sumra fjölskyldumeðlima í hættu.
„Við komuna inn í landið gáfum við okkur fram við landamærayfirvöld sem afgreiddu mál okkar. Sum fengu reynslulausn eða dagsetningu fyrir dómstólum í samræmi við þá réttarfarsreglu sem stjórnarskrá og lög Bandaríkjanna kveða á um. Við mættum í reglulegt eftirlit, fengum vinnuleyfi og kennitölur, skiluðum skattframtölum, störfuðum löglega og lögðum okkar af mörkum til hagkerfinsins. Þess vegna vorum við ekki ógn við landið eða samfélögin sem við bjuggum í.“
Ameríski draumur fólksins sé öryggi og vernd. „Þó að þetta sé erfið staða, trúum við á Guð og bandaríska dómskerfið.“
Sögurnar hryllilegar
Fjölskyldur fólksins tóku að safnast saman fyrir utan búðirnar þegar fréttist af hungurverkfallinu. Heimavarnarráðuneyti Bandaríkjanna er með innflytjendastofnunina á sínu forræði og neitar illri meðferð á fólkinu.
Eftir að ráðuneytið varð ekki við kröfum fólksins um mannúðlegri meðferð jukust mótmælin og þrýstingurinn á að leyfa ítarlegri skoðun á aðstöðunni. Þingmönnum Demókrataflokksins og fulltrúum mannréttindasamtaka hefur verið neitaður aðgangur að búðunum. Í síðustu viku fengu þingmenn að fara þar inn.
„Sögurnar sem við höfum heyrt héðan eru hryllilegar og því miður í samræmi við það sem við höfum heyrt um land allt. Áfram lýgur ICE blákalt um aðstæður í þessum fangabúðum. Ég hef farið í varðhaldsmiðstöðina í Brooklyn þar sem komið er fram við innflytjendur sem glæpamenn þótt þeir séu hvergi á sakaskrá,“ sagði Daniel Goldman, þingmaður Demókrata í fulltrúadeild Bandaríkjaþings.
Hann heimsótti búðirnar ásamt öðrum þingmanni, Jerry Nadler, á miðvikudag.
„Það er kominn tími til að lækka hitann“
Mikie Sherrill, ríkisstjóri New Jersey, tilkynnti á föstudag að lögreglumenn ríkisins tækju yfir löggæslu fyrir utan búðirnar af fulltrúum innflytjendastofnunarinnar. Tilgangurinn væri að reyna að minnka spennuna. Um helgina mættu stuðningmenn innflytjendastofnunarinnar síðan til að sýna henni stuðning.
Ras Baraka, borgarstjóri Newark, setti á útgöngubann í borginni í gær. Hann sagði fjölda fólks hafa verið handtekinn aðfararnótt sunnudags fyrir vopnaburð og það undirstrikaði alvarleika málsins.
Útgöngubannið gildir á svæðinu í kringum Delaney Hall og er frá níu á kvöldin til sex á morgnana, þar til annað kemur í ljós.
Mikie Sherrill, ríkisstjóri New Jersey, sagði grímuklædda mótmælendur hafa hent hlutum, notað girðingar sem vopn og kveikt í dekkjum á götunni við Delaney Hall um helgina. Þá hafi lögreglumenn ekki verið með hlífðarbúnað.
„Ofbeldisfullir og handahófskenndir árekstrar skaða alla. Þeir stofna lífi bæði mótmælenda og löggæslufólks í hættu. Þeir draga athyglina frá fólkinu inni í Delaney Hall og fjölskyldum þeirra og hækka hitann í kringum ICE. Ég tryggi öryggi almennings og neita að gefa ICE afsökun til að ryðjast inn í samfélög okkar. Það er kominn tími til að lækka hitann.“
