Fimm stærstu sjónvarpsstöðvarnar í Bandaríkjunum tóku höndum saman í dag og neituðu að flytja fréttir af Donald Trump forseta, í mótmælaskyni við ákvörðun hans um að meina þremur miðlum aðgangi að Hvíta húsinu.
Trump fyrirskipaði á föstudag að CNN, MS NOW og Politico skildu ekki fá að koma inn í Hvíta húsið til að sinna störfum sínum. Þetta er enn einn kaflinn í áralangri sögu Trumps þar sem hann ræðst gegn fjölmiðlum.
Í sameiginlegri yfirlýsingu sögðu ABC, CBS, CNN, Fox News og NBC að hagsmunir almennings lægju í því að fá nákvæmar og óháðar fréttir af stjórnvöldum.
„Engin ríkisstjórn ætti að takmarka aðgang fréttamiðils vegna þess að hún er ósátt við fréttaflutning hans,“ sagði í yfirlýsingunni.
Þau ætla ekki að sýna frá störfum Trumps í dag en meðal annars stóð til að segja frá ferð forsetans til allsherjarþings Sameinuðu þjóðanna í New York þar sem forsetinn átti að hitta fjölda erlendra þjóðarleiðtoga.
Bætti enn í fúkyrðaflauminn
Fréttastofurnar þrjár kærðu ákvörðun Trumps um að meina þeim aðgöngu að Hvíta húsinu. Þau sögðu það ófyrirleitna atlögu að tjáningarfrelsinu.
Forsetinn sat þó fast við sinn keip og bætti í ef eitthvað er og kallaði fjölmiðla meðal annars ógn við þjóðaröryggi.
„Hvíta húsið er ekki að ráðast gegn frjálsri fjölmiðlun, sem er mér kær,“ sagði Trump í samfélagsmiðlafærslu.
„Við erum að ráðast gegn FALSFRÉTTUM (FAKE NEWS), sem hafa vaxið eins og krabbamein í okkar ástsælu Bandaríkjum.“
