Þrjú af fjórum framboðum í Borgarbyggð eru mótfallin uppbyggingu á vindmyllum í sveitarfélaginu. Sá fjórði segist munu fylgja vilja íbúa sveitarfélagsins.
Fráfarandi sveitarstjórn samþykkti árið 2024 breytingu á deiliskipulagi sem heimilaði fyrirtækinu Hrjónum að reisa tæplega hundrað metra hátt rannsóknarmastur við Grjótháls í Borgarfirði í þeim tilgangi að kanna hvort þar séu forsendur til að reisa vindorkuver.
Rannsóknarmastrið hefur verið reist og sagði Guðveig Lind Eyglóardóttir, forseti sveitarstjórnar og oddviti Framsóknarflokksins, að afgreiðsla sveitarstjórnar á málinu hefði aðeins snúist um leyfi landeiganda til rannsókna á eigin landi.
Davíð Sigurðsson, oddviti Framsóknar í Borgarbyggð, segir að ekki sé gert ráð fyrir vindorkuverum í sveitarfélaginu, seinasta kjörtímabil hafi heldur ekki verið gert ráð fyrir slíkri uppbyggingu.
Haukur Þór Hauksson, oddviti Miðflokksins, segir flokkinn vera alfarið á móti uppbyggingu á vindorkuverum í sveitarfélaginu og Jovana Pavlovic, oddviti Borgarbyggðarlistans, segir flokkinn sömuleiðis vera á því máli að ekki verði reistar vindmyllur í sveitarfélaginu.
„Við segjum samt, vegna þess að lífið er ófyrirsjáanlegt og við sem hreyfing getum haft takmörkuð áhrif á það sem gerist, sérstaklega með tilliti til rammaáætlunar, að vindorkan á að vera í eigu fólksins, auðlind sem á að vera í eigu okkar ekki sérhagsmuna,“ segir Jovana.
Oddviti Sjálfstæðisflokksins, Sigurður Guðmundsson, segir að ákvörðun flokksins muni alfarið byggjast á vilja íbúanna.
„En ef það er eins mikil andstaða og virðist vera í Borgarbyggð þá fylgjum við bara vilja íbúanna.“
Oddvitaumræður í Borgarbyggð í heild sinni má horfa á hér að neðan:
