Þorgerður kennir Pútín um ósigur 29. ágúst
Páll Vilhjálmsson skrifar:
Þorgerður Katrín utanríkisráðherra og formaður Viðreisnar hyggst útskýra tap í þjóðaratkvæðagreiðslunni á laugardag með rússneskum afskiptum. Í viðtali við norsku útgáfuna Aftenposten segir Þorgerður Katrín að lögreglurannsókn standi yfir vegna erlendra afskipta af þjóðaratkvæðagreiðslunni. Í frétt Aftenposten segir:
Gagnvart Aftenposten slær utanríkisráðherra [Íslands] föstu að erlend öfl reyni að hafa áhrif á kosningarnar. Í viðtali við The Guardian segir hún hreint út að hún óttist rússnesk áhrif á þjóðaratkvæðagreiðsluna.
(Overfor Aftenposten slår utenriksministeren fast at noen fra utsiden forsøker å påvirke valget. I et intervju med The Guardian sier hun rett ut at hun frykter russisk påvirkning under folkeavstemningen)
Frétt Aftenposten birtist 18. ágúst og er uppfærð daginn eftir. Auk Þorgerðar Katrínar er Svanborg Sigmarsdóttir framkvæmdastjóri Viðreisnar heimildarmaður norsku útgáfunnar um rússnesk áhrif á íslensk stjórnmál.
Þorgerður Katrín hefur á 20 mánaða embættistíð farið yfir tíu ferðir til Brussel að undirbúa þjóðaratkvæðagreiðsluna. Í sumar stóð utanríkisráðuneytið fyrir innflutningi á ESB-ráðamönnum að boða fagnaðarerindið. Eftir tap á laugardag þarf formaður Viðreisnar að útskýra fyrir Evrópusambandinu hvað fór úrskeiðis. Pútín er afsökun Þorgerðar Katrínar.
Ásakanir um rússneska íhlutun hefur Þorgerður Katrín aðeins frammi í erlendum fjölmiðlum, ekki íslenskum. Á Íslandi vita þeir, sem fylgjast með stjórnmálaumræðunni, að engum rússneskum, bandarískum eða kínverskum afskiptum er til að dreifa. Umræðusamfélagið hér á landi er svo fámennt að við kunnum deili á þátttakendum sem eitthvað kveður að. Gervigreind með íslenskt nafn blekkir fáa.
Fjölmiðlar og blaðamenn hliðhollir Þorgerði Katrínu og ESB-málstaðnum vita sem er að hlegið yrði að ásökunum um rússnesk áhrif á íslenska umræðu. Vísir og RÚV sömdu fréttir um samsæriskenningu utanríkisráðherra í Aftenposten. Fréttirnar birtust að nóttu til og var ekki fylgt eftir. Hjárænulegar fyrirsagnir fréttanna eru samhljóða. Blaðamennirnir vita upp á sig skömmina að lepja upp samsærissull utanríkisráðherra í útlendum fjölmiðlum.
Vísir reið á vaðið aðfararnótt 20. ágúst með fyrirsögninni
Segjast ekki ætla að skipta sér af atkvæðagreiðslunni
Þremur klukkustundum síðar er komið að myrkraverki RÚV:
Rússar segjast ekki ætla að skipta sér af atkvæðagreiðslunni
Með báðum fréttum er stór mynd af Pútín Rússlandsforseta undir fyrirsögninni. Framsetningin skapar hughrif að Rússar skipti sér af kosningunni á laugardag en þverneiti aðild. Neitun Rússa er kynnt sem játning.
Fréttamenn RÚV og Vísis notuðu ekki kunnáttu sína í blaðamennsku. Fréttin kemst fyrir í fyrirsögninni Þorgerður sakar Rússa um afskipti af atkvæðagreiðslunni.
Fréttamennirnir vita sem er að Þorgerður Katrín fer með fleipur. Engin gögn renna stoðum undir ásakanir ráðherra. Ef um væri að ræða rússnesk afskipti myndi einhver gleggri en utanríkisráðherra hafa tekið eftir og sagt frá. Fyrirsagnir Vísis og RÚV vísa ekki í Þorgerði Katrínu. Það spillir rógsherferðinni að vekja athygli á upphafsmanni hennar.
Í spunafræðum, sem eru andstaða við blaðamennsku, er þekkt aðferð að undirbúa jarðveginn með óstaðfestum gróusögum. Komið er á framfæri hálfkveðnum vísum, alið á grunsemdum og ótta. Eftir undirbúning er fundinn flugufótur, t.d. að lögreglan sé að rannsaka.
Í upphafi kosningabaráttunnar notaði Þorgerður Katrín Trump sem grýlu á kjósendur sem afhuga eru ESB-leiðangri. Rétt fyrir kjördag er starfsbróðir Trump í Moskvu vondi kallinn. Utanríkisráðherra kann sig ekki í alþjóðasamskiptum og skaðar orðspor Íslands.
