Þjóðir sem heyja stríð fá ekki að halda söngvakeppni evrópskra sjónvarpsstöðva, samkvæmt nýrri reglu sem skipuleggjendur keppninnar tilkynntu um í dag. Í reglunni kemur fram að þjóðin sem vinnur keppnina geti ekki haldið hana ef vopnuð átök, viðkvæm geopólitísk staða eða aðrar aðstæður hafa áhrif á öryggi eða stöðugleika í viðkomandi ríki eða nágrenni þess.
Þessi breyting er til að bregðast við athugasemdum þátttökuþjóða í Eurovision. Í nóvember var reynt án árangurs að reka Ísrael úr keppninni og eftir það hættu fimm þjóðir við þátttöku, þar á meðal Ísland.
Nýja reglan verður væntanlega túlkuð sem viðbragð við þátttöku Ísraels í keppninni sem hefur verið mjög umdeild vegna hernaðar Ísraels á Gaza og víðar í Miðausturlöndum. Hún nær þó líka til Úkraínu sem er sem kunnugt er í stríði við Rússa. Þegar Úkraína vann keppnina árið 2022 en af öryggisástæðum var ákveðið að halda ekki keppnina þar heldur í Liverpool á Englandi.
Þá hefur aldurstakmark þátttakenda verið hækkað úr 16 árum í 18 ár, auk þess sem reglur um notkun á upptökum í keppninni eru skýrðar.
Næsta keppni fer fram í Búlgaríu í vor.
