Petrína Sigrún Helgadóttir segir að Alexander, 13 ára stjúpsonur sinn, hafi farið út á rafhlaupahjóli á laugardag.
„Og við vitum í raun ekki hvað gerðist. Það voru einhverjir túristar sem sáu þegar hann var dottinn og hringdu á neyðarlínuna,“ segir hún er hún rekur atburðarásina í samtali við Vísi.
Fjölskyldan hafi fengið símtal skömmu síðar og farið á sjúkrahús að hitta drenginn.
Hún segir að blessunarlega hafi verið tekin ákvörðun um að flytja Alexander með þyrlu suður til Reykjavíkur.
„Við héldum að hann væri bara með slæman heilahristing, en þá kemur í ljós að hann er tvíhöfuðkúpubrotinn og [með] tvær innvortis blæðingar.“
Hann dvaldi svo á gjörgæslu Landspítalans í sólarhring.
„Manni líður eins og það sé búið að keyra yfir mann“
Nú liggur drengurinn í sjúkrarúmi á Barnaspítalanum og mun að sögn Petrínu vera þar eitthvað áfram.
Petrína segir að Friðrik, eiginmaður sinn og faðir Alexanders, hafi farið með honum til Reykjavíkur en svo snúið aftur heim í vikunni. Móðir hans sé hjá honum núna. Faðirinn hyggur aftur á að fara suður í vikunni.
Svo hyggst Petrína sjálf fara til Reykjavíkur um helgina til að vera hjá stráknum.
„Við erum bara með vaktaskipti,“ bætir hún við. „Það er nú langt bataferli fram undan hjá honum, greyinu.“
Drengurinn er með meðvitund en Petrína segir fyrsta sólarhringinn hafa verið erfiðan. Hann hafi verið mikið verkjaður og átt sérstaklega erfitt með að vera í mikilli birtu.
„Manni líður eins og það sé búið að keyra yfir mann,“ svarar Petrína þegar hún er spurð hvernig fjölskyldan hafi það. „Maður áttar sig ekki á því hvað þetta er snöggt að gerast.“
Þakkar Guði fyrir hjálminn
Hún þakkar Guði fyrir að Alexander sé á lífi og fyrir það að hann hafi verið með hjálm.
Petrína segir það tíðkast að börn aki um á rafmagnshlaupahjólum eða vespum, jafnvel tvö eða þrjú á hverju ökutæki, og ekkert þeirra sé með hjálm.
Hún nefnir að hún hafi jafnvel séð þrjú hjálmlaus börn á vespu strax næsta morgun eftir slysið og það hafi vakið ónotatilfinningu.
„Það hugsa allir: „Þetta gerist ekki við mig,““ segir Petrína, sem biðlar til að brýna fyrir börnum að nota hjálm og gera sjálf slíkt hið sama.
Pabbinn sendur suður með súkkulaðiköku
Petrína kveðst hafa fengið að ræða við stjúpson sinn í gegnum síma í dag.
„Ég spurði hvort ég gæti gert eða keypt eitthvað fyrir hann og þá svaraði hann: „Mamma, geturðu gert svona franska súkkulaðibitaköku eins og þú gerir alltaf?““
Hún lét ekki biðja sig um það tvisvar og hefur bakað böku sem faðir hans mun síðan taka með í flug suður á morgun. „Hann verður ánægður með það.“
Hún hlakkar til að geta hitt Alexander þegar hún fer suður eftir vinnu á föstudegi.
„Ég get ekki beðið.“
