Um þessar mundir útskrifast úr framhaldsskólum landsins fyrsta kynslóð stúdenta sem hefur haft aðgang að gervigreindarverkfærum alla framhaldsskólagöngu sína.
Könnun sem framkvæmd var í dönskum menntaskólum bendir til að notkun slíkra tækja hafi neikvæð áhrif á getu stúdenta til að tjá sig skriflega.
Halla Stella Sveinbjörnsdóttir, forseti Félags íslenskra framhaldsskólanema, segir að nær allir nemendur noti gervigreind í námi sínu og að auðvelt sé að falla í þá gryfju að ofnota hana.
Formaður Félags framhaldsskólakennara segir mikilvægt að stjórnvöld vinni stefnumörkun á sviði gervigreindar í skólastarfi í samstarfi við skólasamfélagið.
Ósamræmi í einkunnunum
Í umfjöllun Politiken á dögunum var fjallað um könnun sem framkvæmd var á útskriftarárgöngum í 11 dönskum framhaldsskólum en sem fyrr segir er um að ræða fyrsta árganginn sem hefur haft aðgang að gervigreindarverkfærum alla framhaldsskólagönguna.
Í ljós kom að meðaleinkunn nemenda í skriflegum lokaprófum í dönsku hafði lækkað nokkuð mikið á milli ára. Í ár var meðaleinkunnin í slíkum lokaprófum 6,1 en á síðustu árum hefur hún verið á bilinu 6,5–6,8.
Símatseinkunn nemenda, meðaleinkunn úr ritgerðum og öðrum skilaverkefnum, hefur hins vegar staðið í stað.
Í umfjölluninni tengir fjöldi skólafólks þessa þróun við það að nemendur reiði sig í sífellt meira mæli á gervigreind til að leysa verkefni og er kenningin sú að slík notkun bitni á getu nemenda til að tjá sig og hugsa sjálfstætt.
Önnur rödd en nemandans sjálfs
Í samtali við mbl.is segir Halla að hún telji að nær allir íslenskir framhaldsskólanemar nýti sér gervigreind í námi sínu, til dæmis við ritgerðaskrif eða til þess að skilja stærðfræðidæmi.
Spurð hvort hún hafi áhyggjur af því að nemendur noti gervigreind of mikið svarar hún játandi.
„Það er náttúrulega erfitt að hemja sig þegar maður er bara með öll svörin fyrir framan sig. En ég held það fari svolítið eftir bara nemendum,“ segir hún.
„Persónulega, út frá eigin reynslu, er ég oft hrædd um að ég sé sjálf að ofnota þetta til þess að fá svör við alls konar hlutum í staðinn fyrir að reyna að finna út úr þeim sjálf,“ bætir hún við og bendir á að þetta geti bitnað á sjálfstæðri hugsun.
„Þetta minnkar náttúrulega sjálfstæðu, gagnrýnu hugsunina rosalega mikið, það er allt í einu komin smá önnur rödd en manns eigin í ýmis verkefni.“
Kennarar hugsi
Guðjón Hreinn Hauksson, formaður Félags framhaldsskólakennara, segir kennara hér á landi sömuleiðis hugsi yfir stöðunni.
„Kennarar og skólasamfélagið allt er náttúrulega bara á tánum núna að skoða hvernig best er að snúa sér með gervigreindinni,“ segir Guðjón.
Hann tekur þó fram að íslenska framhaldsskólastigið sé allt öðruvísi uppbyggt en það danska og því sé erfitt að meta hvort að nákvæmlega sama þróun sé uppi hér á landi þegar kemur að minnkandi getu nemenda til þess að tjá sig skriflega.
Segir mikilvægt að vinna saman
Íslenskir framhaldsskólar séu mjög sjálfstæðir og því sé brugðist við tilkomu gervigreindarinnar og áhrif hennar metin í hverjum skóla fyrir sig. Guðjón telur þó mikilvægt að unnið verði að heildstæðri stefnumörkun.
„Það er mjög mikilvægt að menntamálaráðuneytið og kennarasamtökin vinni núna saman að stefnumörkun í málefnum gervigreindar, bæði til þess að styðja skólana og fagfólkið við sín störf og sömuleiðis nemendum til hagsbóta,“ segir hann.
„Ég er sannfærður um að við getum nýtt gervigreindina mjög vel til þess að ná markmiðum skólastarfsins. En það verður að byggja á góðri stefnumörkun sem ráðuneytið vinnur með okkur kennurunum en vinnur ekki ofan á okkur og krefur okkur um einhvers konar aðgerðir sem við höfum kannski ekki trú á.”
