Litli ólánsbærinn Zaña í Perú, þar sem um 4000 manns búa, hefur um aldir verið talinn vera undir áhrifum bölvunar. Bæjarbúar binda nú vonir við að heimsókn Leós XIV páfa síðar í mánuðinum muni aflétta bölvuninni.
Á tíma spænskra yfirráða var Zaña þekktur fyrir að vera auðugur verslunarbær. Þar voru byggðar margar glæsilegar kirkjur og íbúarnir lifðu í vellystingum. Bærinn er einnig frægur fyrir það að trúboðinn Toribio de Mogrovejo, sem sneri frumbyggjum Perú til kristni, lést þar árið 1606.
Seinna varð bærinn reglulega fyrir árásum sjóræningja og árið 1720 var hann gjöreyðilagður í gríðarlegu vatnsflóði. Kirkjurnar hrundu og hrægammar hreiðruðu um sig í rústum þeirra.
Því hafa ýmsar sögur um guðlega refsingu spunnist um bæinn sem sumir rekja til prests sem var myrtur á nýlendutímanum. Morðið á honum er sagt hafa sett bæinn út af hinu kristna sakramenti. Nú eygja bæjarbúar hins vegar von um að hagur þeirra vænkist.
Páfinn „kemur heim“
6. nóvember leggur Leó XIV páfi af stað í 11 daga ferð um Suður-Ameríku. Ferðin verður eflaust strembin þar sem páfinn er að jafna sig eftir aðgerð sem hann undirgekkst vegna lungnakrabbameins. Hann hefur þó ekki viljað breyta ferðaáætluninni.
Páfinn byrjar á að heimsækja Úrúgvæ, þá Argentínu og loks Perú, þar sem hann bjó og starfaði í tvo áratugi, þar á meðal sem biskup í strandbænum Chiclayo. Tengsl páfans við landið eru því sterk og Perúbúar tala um að hann sé að „snúa heim“ en hann fékk perúskan ríkisborgararétt árið 2015.
Á Perúárunum kom páfinn reglulega til Zaña í tengslum við hátíð heilags Toribios og í heimsókninni snýr hann aftur í þorpið til að minnast þess að 300 ár eru liðin frá því að Toribio var tekinn í dýrlingatölu.
Íbúarnir búa sig nú undir athöfnina með því að mála kirkjur og hús og kaupa fána Vatíkansins í bílförmum til að skreyta þorpið með. Þeir eru þess fullvissir að með komu Leós XIV páfa verði bölvuninni aflétt og að framtíð Zaña sé björt í fyrsta skipti í þrjár aldir.
