Afdráttarlausum stuðningi við Úkraínu var lýst yfir á leiðtogafundi Evrópusambandsins sem nú stendur í Brussel. Leiðtogar aðildarríkjanna eru þó ekki sammála um mögulegar friðarviðræður við stjórnvöld í Rússlandi - og hver ætti að vera þar í forsvari.
Í stóra samhenginu snýst þetta um hvaða stöðu Evrópusambandið ætlar að taka, þegar og ef kemur að einhvers konar friðarviðræðum Rússa og Úkraínumanna; leiðtogar Evrópuríkja og Evrópusambandsins hafa ítrekað lýst því yfir að fulltrúi, eða fulltrúar þeirra, ættu að vera við slíkt samningaborð ásamt fulltrúum Rússlands, Bandaríkjanna og Úkraínu.
Forseti leiðtogaráðs Evrópusambandsins, Antonio Costa, steig svo inn í þessa umræðu, þegar í ljós kom fyrir nokkrum dögum að hann hefði beðið embættismann á skrifstofu sinni að „opna á talsamband“ við stjórnvöld í Kreml, eins og ónefndur embættismaður orðaði það í skilaboðum til fréttamanna hér á leiðtogafundinum í gær. Ekkert frekar hefði verið gert og engar samningaviðræður væru í gangi; einungis væri verið að undirbúa samskipti. „diplómatar [eru] að vinna vinnuna sína“ sagði í þessum skilaboðum.
Ekki rétti tíminn og ekki rétti forsvarsmaðurinn
Fréttir af þessu urðu hins vegar til þess að nokkrir leiðtogar aðildarríkjanna, þar á meðal Emmanuel Macron Frakklandsforseti og Friedrich Merz Þýskalandskanslari brugðust við á neikvæðan hátt á leiðtogafundinum sem nú stendur yfir, og sögðu að þetta væri ekki rétti tíminn og að ríkjahópurinn sem gengur undir nafninu E3 ætti að vera í forsvari fyrir mögulegum viðræðum við Rússa.
Sá hópur samanstendur af Frakklandi, Bretlandi og Þýskalandi, sem hafa vel að merkja verið hvað mest áberandi hvað varðar stuðning við Úkraínu. Bretland og Þýskaland hafa leitt stuðningshóp meira en fimmtíu ríkja sem styðja við Úkraínu; fulltrúar þeirra, þar á meðal Íslands) hittast reglulega og síðast í höfuðstöðvum NATO í gær.
Fleiri leiðtogar ESB ríkja urðu til að gagnrýna Costa fyrir þetta framtak á leiðtogafundinum hér í Brussel, þar á meðal frá Danmörku og baltnesku ríkjunum; aðrir studdu forseta leiðtogaráðsins og vilja þar með að Evrópusambandið taki beinan þátt í mögulegum friðarviðræðum.
Útkoman úr slíkum viðræðum skiptir auðvitað máli fyrir ESB, ekki síst núna þegar aðildarviðræður við Úkraínu eru hafnar; fyrstu kaflanir voru opnaðir á mánudaginn síðasta og fleiri væntanlega í næsta mánuði.
