Útlit er fyrir að almenningssamgöngur á Suðurlandi verði skertar verulega. Vegagerðin ber við fjárskorti.
Ferð 73 milli Reykholts og Selfoss lögð alveg niður
Anton Kári Halldórsson, formaður stjórnar Samtaka sunnlenskra sveitarfélaga, hefur miklar áhyggjur af þessum breytingum og gagnrýnir fækkun ferða á leið 51, milli Reykjavíkur og Selfoss - og leið 71, milli Hveragerðis og Þorlákshafnar - og að leið 73 milli Selfoss og Reykholts verði lögð alveg niður. Það skerði aðgengi íbúa að námi, vinnu og þjónustu.
Á sama tíma og nýsamþykkt samgönguáætlun kveði á um að efla almenningssamgöngur til að bæta þjónustu sé Vegagerðinni gert að mæta 660 milljóna króna vanfjármögnun með því að skera niður í almenningssamgöngum á landsbyggðinni.
„Þetta hefur náttúrulega bara þær afleiðingar að umferðin eykst á vegunum okkar, það ferðast þá náttúrulega fleiri með einkabílum og náttúrulega ekki hvað síst þessi leið sem á að fella út uppi í uppsveitum, þetta er náttúrulega bara skólarúta krakkanna okkar sem eru að fara í skóla á Selfossi þannig að það er algjör forsendubrestur fyrir krakkana að komast í skólann.“
Fjármagnið dugir ekki til
Hulda Rós Bjarnadóttir, sérfræðingur á deild almenningssamgangna hjá Vegagerðinni, segir mikinn vilja hjá Vegagerðinni að halda þjónustunni óbreyttri eða jafnvel auka við ferðir en fjármagnið dugi ekki til.
„Við sjáum ekkert annað í stöðunni en að skerða þjónustu.“
Og er Vegagerðin í einhverjum viðræðum við stjórnvöld um að fá þessu eitthvað breytt eða fá meira fjármagn inn?
„Já Vegagerðin hefur gert það og hefur sent mörg minnisblöð bæði til ráðuneytis og annarra stjórnvalda sem fara með þessa málaflokka og bent ítrekað á að núverandi rekstur er nú þegar í rauninni mjög þröngur þannig að það þarf aukið fjármagn til að reka almenningssamgöngur á landsbyggðinni.“
