Mynd er nú komin á Þjóðarhöllina, fjölnota íþróttamannvirki, sem á að rísa í Laugardalnum. Til stendur að Þjóðarhöllin muni kosta 16,8 milljarða króna og verður verkið í höndum Íslenskra aðalverktaka hf. Helgi Geirharðsson, verkefnastjóri Þjóðarhallar ehf., segir í samtali við Mbl, að framkvæmdir hefjist í haust og Þjóðarhöllin verði fullrisin árið 2030, til stendur svo að halda HM í handbolta á Íslandi, Danmörku og Noregi árið 2031.
Sjá frétt: Svona mun Þjóðarhöllin líta út
Margir hafa fagnað því að útboðs- og samningaferlinu sé lokið til að hægt sé að fara að hefjast handa við framkvæmdir, þar á meðal Dagur B. Eggertsson, þingmaður Samfylkingarinnar og fyrrverandi borgarstjóri, sem segir:
„Þetta er eitt flóknasta verkefni sem ég man eftir að hafa komið að – og aðeins útboðs- og valferli Hörpu var eitthvað sambærilegt. Lykil samningar um Þjóðarhöll á milli ríkis og borgar náðust á síðustu dögum mínum í embætti borgarstjóra – sem mér þótti sérstaklega vænt um. En ferlið í kjölfarið var ekki síður langt og strangt, sem nú lýkur með þessari glæsilegu niðurstöðu,“ segir hann í færslu á Facebook. „En til hamingju ekki síður landslið Íslands og íþróttahreyfingin í heild með þetta glæsilega mannvirki og byltinguna sem því mun fylgja varðandi alla aðstöðu. Til hamingju með Þjóðarhöll!“
Og hvar koma bílastæði?
Það hrópa þó ekki allir húrra fyrir nýju Þjóðarhöllinni og setja sumir ýmis spurningamerki við teikningarnar. Ein sem setur spurningamerki er fasteignasalinn Guðbjörg Helga Jóhannesdóttir sem tekur Þjóðarhöllinni fagnandi en vill að framkvæmdin sé hugsuð alla leið, hún spyr: „Og hvar koma bílastæði í stað þeirra sem fjarlægð verða með auknum húsakosti þarna?“
Það þurfi einnig að tala saman mögulegar breytingar á Suðurlandsbraut með tilliti til Borgarlínu sem er nú til endurskoðunar. Þar að auki gætu stórir flutningabílar þurft að koma að þegar haldnar eru stórar sýningar og annað. „Einnig þarf aðkoma rúta að vera góð er stór og fræg keppnislið koma saman í rútu á keppnissvæði þar sem öryggi allra er tryggt.“
Helgi var spurður út í bílastæðin og hann sagði það undir borgaryfirvöldum komið. „Það eru tækifæri til þess að búa til ný bílastæði þarna í kring þannig að það er bara ákvörðunarmál hjá borginni sjálfri hvort og hvernig þeir vilja bæta við bílastæðum á þau auðu svæði sem þarna eru til staðar.“
Jónas nokkur, sem er íbúi í Laugardalnum, segir að samkvæmt nýju hönnuninni þá hverfi nokkrir tugir bílastæða fyrir aftan núverandi Laugardalshöll. „Sem íbúi í Laugardalnum þá hef ég áhyggjur. Það er mikið álag á hverfið bæði við Álfheima og Laugarlæk þegar það eru stór viðburðir. Það á semsé að bæta við nýrri stórri höll og fækka bílastæðum um leið,“ segir hann. Leitaði hann á náðir gervigreindarinnar til að búa til höll með bílastæði á þakinu sem væri þá aðgengilegt frá Suðurlandabraut. „Var engin svona rökrétt lausn skoðuð?“
Verkið standað á ríkinu
Björn Leví Gunnarsson, fyrrverandi þingmaður Pírata, segir að ákvörðun um að reisa Þjóðarhöllina hafi alltaf strandað á ríkinu. „Ég var á fundum þar sem þetta var einmitt rætt. Ríkið kemur og lofar alls konar framkvæmdum þarna og borgin segir „frábært, hvernig?“ og svo gerist ekkert þangað til ríkið segir aftur „þjóðarhöll!“. Borgin kemur þá og segir „æðislegt, sama og síðast?“ … og svo framvegis,“ segir hann. „Það hefur verið þetta fram og til baka rugl sem gerir það að verkum að áætlanir ruglast alltaf. Það fram og til baka rugl er algerlega á ábyrgð ríkisins. Loforð og brotin loforð.“
Hvers vegna ekki að klára fyrst Laugardalsvöll?
Máni Pétursson, stjórnarmaður KSÍ, kallar eftir svörum við forgangsröðun.
„Endilega útskýra fyrir mér afhverju það er ráðist í þetta áður en Laugardalsvöllur er kláraður. Fótbolti er stærsta og vinsælasta íþrótt á Íslandi,“ segir Máni. „Hún er sú íþrótt sem kemur með margfalt meiri tekjur inn til landsins en hinar íþróttagreinarnar gera til samans. Hvernig getið þið komist að þeirri niðurstöðu að það sér best að ráðast í þessa byggingu fyrst?“
Dagur segir að þetta skýrt út frá sjónarmiði borgarinnar. „Bæði verkefni er stór – og þörf – en Þjóðarhöllin svarar líka brýnni þörf barna- og unglinga fyrir æfingaaðstöðu í gríðarlega vinsælum boltagreinum (körfubolta og handbolta) í Laugardalnum – og stórbætir fimleikaaðstöðuna einnig,“ segir hann.
„Allt er þetta sprungið en aðstaðan verður frábær (á heimsmælikvarða). Í Laugardalnum eru þegar fyrir hendi (það var líka gerð gangskör í því) þrír upphitaðir gervigrasvellir í fullri stærð til æfinga og keppni í knattspyrnu. Umbætur á Laugardalsvelli eru hins vegar fyrst og fremst fyrir áhorfendur (þegar búið að bæta úr vellinum sjálfum með hybrid grasi) þannig að borgin taldi eðlilegt að í því verkefni yrði ríkið og KSÍ í leiðandi hlutverki. Það er enn á dagskrá en hefur ekki verið botnað. Í forgangsröðun borgarinnar er sem sagt aðstaða barna og unglinga og tækifæri til íþróttaiðkunar nr. 1.“
Ekki endanlegt nafn
Stærðfræðingurinn og samfélagsrýnirinn Einar Steingrímsson setur spurningamerki við nafngiftina. „Hvers konar þvæla er það eiginlega að kalla þetta iþróttahús í Reykjavík „þjóðar“höll?“
Hagfræðiprófessorinn Gauti B. Eggertsson slær á létta stengi og kallar Einar „yfirnöldrara Íslands“. „Það er ekkert endalegt nafn komið. Settu nú fram einhverjar hugmyndir sjálfur. Þú getur þetta Einar!,“ segir Gauti. „Vera nú dálítið skapandi og frumlegur ekki endalaust nöldur. Það var svo löngu kominn tími að við fengjum almennilega íþrótta …. höll? Eða þjóðarleikvang? Hljómar boring. Þjóðarsportið er handbolti. Það verður ótrúleg stemmning þarna á leikjum!!“
Golfarinn Viggó Haraldur Viggósson telur að annmarkar á þessu verkefni muni fjölga frekar en fækka þegar. „Húsið verður rekstrarlega andvana fætt (byggt á því sem ég hef séð um húsið),“ segir hann. „Það er synd að við skulum ekki hugsa stærra; húsið á eftir að standa um ókomna áratugi og að líkum verður það talið gallað/ófullnægjandi fljótlega eftir að rekstur þess hefst.“
Dagur segir að það hafi verið legið yfir þessu húsi lengi og það sé hugsað til langs tíma. „Rýnt var sérstaklega í bestu rekstrarmódel og horft til Þrándheims, þar sem nýrri og eldri höll eru samreknar.“
