Til stendur að stofna sjálfshjálparhóp fyrir karlmenn með andlegan vanda á Austurlandi. Stofnandi hópsins segir skort á úrræðum sem miða sérstaklega að körlum í landshlutanum.
„Það er ljóst að það er andlegur vandi á meðal karlmanna, ungra sem eldri á svæðinu, sem engin úrræði ná yfir“ segir Sveinn Snorri Sveinsson í viðtali við fréttastofu. Hann er íbúi á Egilsstöðum og stofnandi sjálfshjálparhópsins ásamt Trausta Traustasyni.
„Þetta kemur til með að vera grúppa, grúppufundir, þar sem setið er við borð og það er einn stjórnandi og orðið er látið ganga hringinn. Í upphafi fundar er spurt hvort einhver vilji byrja og ef enginn er tilbúinn til þess hefur grúppustjórinn fundinn með eigin tjáningu. Síðan geta hinir spurt. Við tjáum okkur um öll möguleg dýpstu mál og erum ekki hræddir við að tjá sársauka.“
Vikulegir fundir í Safnaðarheimili Egilsstaðakirkju
Sjálfshjálparhópurinn er opinn öllum karlmönnum, þótt líklega verði miðað við 18 ára aldurstakmark – að minnsta kosti til að byrja með.
„Þessi vandamál geta verið margvísleg. Fyrst og fremst er um einhvers konar andleg vandamál að ræða og það getur verið alkóhólismi, spilafíkn og önnur fíkn sem orsakar það að hluta til eða gerir það verra,“ segir Sveinn Snorri.
Hann hefur sjálfur glímt við alvarleg veikindi síðan 1994. Hann sótti stuðning í sjálfshjálparhóp á vegum Rauða krossins og Geðhjálpar á Egilsstöðum en hópurinn lagðist af fyrir fáeinum árum.
Sveinn Snorri segir þau úrræði sem eru í boði á Austurlandi ekki sérstaklega miðuð að því að mæta þörfum karlmanna með andleg vandamál. Sjálfshjálparhópurinn verður stofnaður næsta laugardag, 27. júní, í Safnaðarheimilinu á Egilsstöðum klukkan 10.
„Hópurinn mun koma saman vikulega. Við munum hefja starfsemi strax á stofnfundinum.“
