Ákvörðun um að ferjan Baldur yrði fengin til að leysa Herjólf af var tekin með stuttum fyrirvara, segir upplýsingafulltrúi Vegagerðarinnar. Stefnt er að því að hefja dýpkun í Landeyjahöfn í dag.
Breiðarfjarðaferjan Baldur leysir Herjólf af næstu daga og siglir á milli Þorlákshafnar og Vestmannaeyja. Í samtali við fréttastofu í gær gerði bæjarstjóri Vesturbyggðar athugasemd við það að ekkert samráð hafi verið haft við sveitarfélagið þegar þessi ákvörðun var tekin.
G. Pétur Matthíasson, upplýsingafulltrúi Vegagerðarinnar, segir að vegna aðstæðna í Vestmannaeyjum hafi þurft að taka ákvörðun hratt.
„Þetta eru náttúrulega mjög óvenjulegar aðstæður og við reynum af fremsta megni að hafa sem best samráð við alla aðila. Það er frekar óheppilegt að það þurfti að taka þessa ákvörðun svona hratt,“ segir G. Pétur.
„Þannig að það má alltaf bæta það að upplýsa fólk og það er auðvitað nauðsynlegt að gera það eins og kostur er. En í þessu tilviki voru aðstæður kannski svolítið sérstakar, eða við höfum það okkur til afsökunar.“
Framkvæmdu dýptarmælingar í Landeyjahöfn í gær
G. Pétur segir að Vegagerðin hafi gert dýptarmælingar í Landeyjahöfn í gær. Mikill sandur hafi safnast saman í hafnarmynninu síðan þá og því sé stórt verk fyrir höndum.
Samt sem áður segir hann að veðurspá sé hagstæð og að höfnin verði opnuð eins fljótt og auðið er.
„Ég reikna með að Álfsnesið hafi farið í morgun að reyna að dýpka og það er útlit fyrir að það verði hægt að dýpka næsta dag. Þannig að við vonumst til þess að það verði hægt að opna höfnina í þessum glugga, allavega þannig að það sé hægt að sigla í höfnina á sjávarföllum.“
Til stendur að Herjólfur III, varaskip fyrir Herjólf, verði fái haffærisskírteini í næstu viku og verði þá tilbúinn til siglinga. Skipið hefur legið við bryggju í Sundahöfn að undanförnu.
