Kolbeinn H. Stefánsson, dósent í félagsfræði við Háskóla Íslands, veltir því fyrir sér hvers vegna gerðar séu strangari líkamlegar kröfur til karla en kvenna sem sækja um nám í lögreglufræði.
Kolbeinn fjallar um málið í nýjum pistli undir yfirskriftinni „Þrekpróf lögreglunnar“ og segist hafa dottið niður í skrítna kanínuholuþegar hann skoðaði inntökupróf verðandi lögreglumanna.
Hann tekur fram að fjölgun kvenna innan lögreglunnar sé jákvæð og að mikilvægt sé að bæði kynin starfi á þeim vettvangi. Hins vegar skilji hann ekki hvers vegna umsækjendur þurfi að standast mismunandi þrekviðmið eftir kyni.
Karlar þurfa að hlaupa hraðar og lyfta nær tvöfalt meira
Þrekprófið er fjölþætt og meðal annars er gerð krafa um hlaup, stökk, styrktaræfingar og sund.
Samkvæmt Kolbeini þurfa karlar að hlaupa 2.000 metra á innan við níu og hálfri mínútu en konur fá ellefu mínútur til þess. Karlar þurfa að stökkva 2,1 metra án atrennu en konur 1,7 metra.
Þá þurfa karlar að gera upphífingar en konur niðurtog. Í hraðaprófi, þar sem hlaupið er í áttu milli tveggja keila, fá karlar 17 sekúndur en konur 19 sekúndur.
Mestur er munurinn í bekkpressu. Þar þurfa karlar að lyfta 60 kílóum en konur 32,5 kílóum. Sundprófið er eini hluti prófsins þar sem sömu viðmið gilda fyrir bæði kyn.
„Af hverju getur karl með sömu getu ekki sinnt starfinu jafn vel?“
Kolbeinn segist gera ráð fyrir því að hæfni til að hlaupa, stökkva, klifra og lyfta þungum hlutum geti skipt máli í lögreglustarfi. Þá hljóti þrekprófið að eiga að tryggja að umsækjendur geti tekist á við líkamlegar kröfur starfsins.
Hann spyr hins vegar hvers vegna karlmaður sem nær sömu árangri og kona teljist ekki hæfur til starfsins.
„Ef kona getur sinnt þessu starfi hlaupandi 2 kílómetra á 11 mínútum, stökkvandi 1,7 metra atrennulaust og lyftandi 32,5 kílóum í bekkpressu, sem hún augljóslega getur, af hverju getur karl með sömu getu ekki sinnt starfinu jafn vel?“ spyr Kolbeinn.
Hann telur rökréttara að eitt sameiginlegt viðmið gildi fyrir alla umsækjendur og að það miðist við þá líkamlegu getu sem raunverulega sé nauðsynleg til að geta sinnt lögreglustarfi.
„Af hverju er ekki bara eitt viðmið fyrir alla umsækjendur óháð kyni sem miðast við það sem er talið nauðsynlegt fyrir starfið?“
