„Ég ætla að segja nei í ágústlok,“ skrifar Sólveig Anna Jónsdóttir, formaður Eflingar, í Facebook-færslu þar sem hún greinir frá afstöðu sinni til þjóðaratkvæðagreiðslunnar um áframhaldandi viðræður Íslands við Evrópusambandið sem fram fer 29. ágúst.
Sólveig Anna segist vona að stuðningsfólk ESB-aðildar virði ólíkar skoðanir og láti vera að kalla hana „fávita, aumingja eða drullusokk“ vegna afstöðu hennar.
Ekki spurning um tilfinningar heldur rök
Sólveig Anna segir afstöðu sína byggja á reynslu Evrópu af evrukreppunni sem skall á árið 2010 og árin þar á eftir.
Að hennar mati sýndi kreppan veikleika sameiginlegs gjaldmiðils þegar skuldug ríki Suður-Evrópu þurftu að grípa til svokallaðra innri gengisfellinga til að endurheimta samkeppnishæfni. Grikkland sé þekktasta dæmið um slíkar aðgerðir.
Hún bendir á að grísk stjórnvöld hafi þurft að ráðast í umfangsmikinn niðurskurð á opinberri þjónustu og velferðarkerfum til að uppfylla kröfur lánardrottna og stofnana Evrópusambandsins.
„Til að vera samkeppnishæf þurfa lönd að vera tilbúin til að grípa til grimmilegs niðurskurðar og mikils og mögulega langvarandi atvinnuleysis til að endurheimta eða bæta samkeppnisstöðu,“ skrifar Sólveig Anna.
Hún telur að ef Ísland gengi í Evrópusambandið og tæki upp evru gætu Íslendingar staðið frammi fyrir sambærilegum aðgerðum þegar næsta efnahagskreppa skellur á.
Segir smærri ríki og verkalýðshreyfingu missa áhrif
Formaður Eflingar segir efnahagslegt réttlæti vera lykilforsendu farsællar samfélagsþróunar og telur mikilvægt að verkalýðshreyfingin hafi raunveruleg áhrif á pólitískar og efnahagslegar ákvarðanir.
Að mati Sólveigar Önnu leiðir miðstýring innan Evrópusambandsins og sameiginlegur gjaldmiðill til þess að almenningur í aðildarríkjunum hafi minna svigrúm til að móta eigin efnahags- og samfélagsstefnu.
Hún segir að slíkt dragi úr áhrifum verkalýðsfélaga og annarra almannasamtaka og færi völd í auknum mæli til embættismanna og stofnana sem séu fjær almenningi.
„Evrópusambandið veikir með sínum yfirþyrmandi teknókratísku lausnum og áherslum lýðræðislega getu fólks í gegnum stjórnmálaflokka í þjóðríkjunum til að stjórna samfélögum sínum,“ skrifar hún.
Hvetur til virðingar í umræðunni
Að lokum hvetur Sólveig Anna fólk til að ræða málið af virðingu þótt skiptar skoðanir séu um Evrópusambandið.
„Ég hvet okkur öll til að hugsa sjálfstætt og skoða málin óhrædd. Ég vona að mörg séu mér sammála – en þoli vel að fólk sé það ekki. Vona samt að þið stillið ykkur um að kalla mig fávita, aumingja eða drullusokk – allavega ef það er vegna skoðana minna á ESB.“
