Hollvinir Sjúkrahússins á Akureyri hafa afhent gjörgæslu- og lyflækningadeild Sjúkrahússins tíu nýjar BiPAP öndunarvélar sem munu styrkja verulega getu deildanna til að veita sjúklingum með öndunarfærabilun nauðsynlegan öndunarstuðning.
Hollvinir SAK eru sjálfstæð stuðningssamtök sem safna fjármagni til að efla starfsemi Sjúkrahússins á Akureyri með kaupum á tækjum og öðrum búnaði sem nýtist sjúklingum og starfsfólki.
Gamlar vélar orðnar úr sér gengnar
Að sögn Brynju Drafnar Tryggvadóttur, deildarstjóra gjörgæsludeildar, geta nýju vélarnar sinnt fjölbreyttum verkefnum, allt frá háflæði súrefnismeðferð til öndunarstuðnings með þrýstingi sem auðveldar sjúklingum að draga andann. Þá geti þær einnig nýst sem varaöndunarvélar fyrir alvarlega veika sjúklinga sem eru í öndunarvél.
Hún segir gjöfina marka mikilvæg tímamót fyrir Sjúkrahúsið á Akureyri. Fram að þessu hafi aðeins verið til fimm BiPAP vélar sem hafi verið mikið notaðar í gegnum árin og orðnar bæði gamlar og úr sér gengnar.
„Þær voru ekki nægilega margar og stundum höfum við þurft að forgangsraða notkun þeirra. Nýju vélarnar aðlagast betur þörfum hvers einstaklings og endurspegla nýjustu þróun á þessu sviði,“ segir Brynja.
Stuðningur sem skiptir máli
Brynja segir stuðning Hollvina skipta starfsemi Sjúkrahússins á Akureyri miklu máli.
„Það er ómetanlegt fyrir okkur sem stofnun að fá gjafir og styrki líkt og Hollvinir veita okkur, enda skiptir það miklu máli að finna stuðning samfélagsins við starfsemi Sjúkrahússins. En fyrst og fremst er þetta auðvitað ómetanlegt fyrir sjúklingana okkar, því með þessum búnaði getum við veitt þeim bestu mögulegu þjónustu,“ segir hún.
