Fylgi flokkanna er mjög misskipt eftir því hvar er spurt, samkvæmt nýjum Þjóðarpúlsi Gallups sem var birtur í gær. Í sumum kjördæmum virðist vera að teiknast upp nýr veruleiki þar sem gamlir forystuflokkar gefa eftir og aðrir hafa styrkt stöðu sína á móti.
Þetta sést einna best í Suðvesturkjördæmi þar sem Sjálfstæðisflokkurinn naut löngum yfirburðastöðu en hefur mælst þriðji stærsti flokkur kjördæmisins í fimm af síðustu sex könnunum. Svipaða sögu er að segja af Norðvesturkjördæmi þar sem Miðflokkurinn og Samfylkingin hafa skotið sér upp fyrir Sjálfstæðisflokkinn og Framsóknarflokkinn.
Við lítum í dag á fylgi flokka eftir kjördæmum eins og það birtist í Þjóðarpúlsi Gallups sem var opinberaður í gær. Þar kom meðal annars fram að Samfylkingin nýtur enn mests fylgis allra flokka en Sjálfstæðisflokkurinn hefur bætt við sig tveimur prósentustigum milli kannana.
Rétt er að hafa í huga að skekkjumörk verða stærri eftir því sem færri svör eru bak við hlutfallstölurnar. Þannig svaraði 3.431 Þjóðarpúlsinum á landsvísu. Þar af voru 1.080 svör úr Suðvesturkjördæmi, þar sem þau voru flest, en 287 í Norðvesturkjördæmi, þar sem þau voru fæst. Og eins og alltaf getur mikið breyst á skömmum tíma.
Samfylkingin langstærst í Reykjavík
Við skulum líta á Reykjavíkurkjördæmin tvö sem eina heild að þessu sinni því þrátt fyrir skiptingu höfuðborgarinnar munar í flestum tilfellum ekki miklu á fylgi flokkanna norðan og sunnan skiptingar.
Samfylkingin ber höfuð og herðar yfir aðra flokka í höfuðborginni með 35 og 36 prósenta fylgi. Þetta er sterkasta vígi Samfylkingarinnar og mesta fylgi sem nokkur flokkur mælist með í stökum kjördæmum. Í kosningunum fékk hún 23 og 26 prósenta fylgi í höfuðborginni.
Sjálfstæðisflokkurinn mælist næststærstur í báðum Reykjavíkurkjördæmum með nítján prósenta fylgi. Þetta er meira fylgi en í kosningum þar sem flokkurinn fékk tæp átján prósent.
Mesta muninn á fylgi flokks í Reykjavíkurkjördæmunum er að finna hjá Miðflokknum. Hann fær 15 prósent í Reykjavík suður en tæp 10 prósent í Reykjavík norður, sem er versta útkoma flokksins á landinu öllu.
Nú bregður svo við að Vinstri græn fengju kjördæmakjörinn þingmann í Reykjavík norður, samkvæmt könnuninni. Flokkurinn hefur ekki mælst með þingmann í Þjóðarpúlsum Gallups síðan í mars 2024, í rúm tvö ár.
Framsóknarflokkurinn virðist ekki vera að ná vopnum sínum á höfuðborgarsvæðinu og mælist aðeins með 2,4% í Reykjavík norður. Það er versta útkoma flokksins í nokkru kjördæmi að þessu sinni.
Sjálfstæðisflokkur gefur eftir í Suðvesturkjördæmi
Sú var tíðin að Suðvesturkjördæmi var eitthvert sterkasta vígi Sjálfstæðisflokksins. Hann fékk flest atkvæði allra flokka í öllum þingkosningum nema einum frá 2003 til 2024. Það var aðeins árið 2013 sem flokkurinn var ekki stærstur, þegar Samfylkingin vann kosningasigur 2009.
Nú mælist Sjálfstæðisflokkurinn (23,0%) hálfu prósenti minni en Miðflokkurinn (23,5%). Þetta er í fimmta skipti á síðustu sex mánuðum sem Sjálfstæðisflokkurinn er aðeins þriðji stærsti flokkurinn í kjördæminu.
Samfylkingin er þó sá flokkur sem mælist með mest fylgi í kjördæminu og Viðreisn er í fjórða sæti með þrettán prósent.
Enginn annar flokkur mælist með meira en 3,3 prósent í Kraganum. Kjördæmakjörnir þingmenn þessa fjölmennasta kjördæmis landsins myndu því allir skiptast á fjóra flokka.
Miðflokkurinn stærstur í Norðvesturkjördæmi
Í sögunni hafa Sjálfstæðisflokkurinn og Framsóknarflokkurinn verið stærstir flokka í Norðvesturkjördæmi en þar mælist Miðflokkurinn nú með mest fylgi, 24 prósent, og Samfylkingin næstmest, tæp 22 prósent.
Þetta er í fjórða skipti síðasta hálfa árið sem Miðflokkurinn mælist stærstur í kjördæminu. Hin tvö skiptin hefur Samfylkingin haft vinninginn. Þau rúmlega 24 prósent sem Miðflokkurinn mælist með í Norðvesturkjördæmi er besta útkoma flokksins eftir kjördæmum að þessu sinni.
Sjálfstæðisflokkurinn og Framsóknarflokkurinn mælast nálægt því fylgi sem þeir fengu í síðustu kosningum. Fylgi Viðreisnar og Flokks fólksins er aðeins rúmlega þriðjungur af því sem flokkarnir uppskáru úr kjörkössunum.
Atkvæðin dreifast mest í Norðausturkjördæmi
Eitt kjördæmi sker sig frá öllum öðrum þegar kemur að dreifingu atkvæða. Það er Norðausturkjördæmi þar sem sex flokkar fengju kjördæmakjörna þingmenn.
Samfylkingin (33,7%) mælist að vísu langstærst og með meira fylgi en tveir næstu flokkar til samans. Það eru Miðflokkurinn (15,9%) og Sjálfstæðisflokkurinn (15,7%). Þetta er annað tveggja kjördæma þar sem Framsóknarflokkurinn nær tveggja stafa tölu í fylgi (að aukastöfum slepptum) og kjördæmið þar sem bæði Flokkur fólksins og Vinstri græn fá sína bestu útkomu. Viðreisn og Píratar eiga aftur á móti hvergi minna fylgi að fagna.
Sjálfstæðisflokkur og Miðflokkur stærstir í Suðurkjördæmi
Sterkasta vígi Sjálfstæðisflokksins að þessu sinni er að finna í Suðurkjördæmi þar sem ýmist Miðflokkurinn eða Samfylkingin hafa mælst stærst síðustu mánuði.
Sjálfstæðisflokkurinn mælist með rúmlega 29 prósenta fylgi, rúmlega fimm prósentustigum meira en Miðflokkurinn. Samfylkingin fengi aðeins rúmlega 17 prósent samkvæmt könnuninni sem er versta niðurstaða hennar eftir kjördæmum og myndi aðeins skila henni þriðja sæti í kjördæminu.
Flokkur fólksins var stærstur flokka í Suðurkjördæmi í síðustu Alþingiskosningum með 20 prósent en mælist nú með tæplega helming þess fylgis, rúm 8 prósent.
Framsóknarflokkurinn og Viðreisn mælast með tæp átta prósent og lækka báðir um þrjú til fjögur prósent frá kosningum. Þá fékk Framsókn einn kjördæmakjörinn þingmann og þáverandi formaður flokksins datt inn sem uppbótarmaður þegar lokatölur birtust. Nú yrðu þeir að gera sér vonir um uppbótarsæti að góðu.
Leiðrétt: Samfylkingin en ekki Framsóknarflokkurinn er eini flokkurinn sem hefur náð að verða stærri en Sjálfstæðisflokkurinn í Suðvesturkjördæmi í kosningum.
