Séra Guðni Már Harðarson hefur verið skipaður prestur íslenska safnaðarins í Danmörku og mun jafnframt gegna embætti sendiráðsprests Íslands í Kaupmannahöfn. Embættið var meðal þeirra prestsstarfa sem auglýst voru laus til umsóknar fyrr á þessu ári.

Sendiráðspresturinn hefur starfsstöð í sendiráði Íslands í Kaupmannahöfn og sinnir þjónustu við Íslendinga búsetta í Danmörku.

Samkvæmt tilkynningu frá Þjóðkirkjunni var Guðni Már vígður til prestsþjónustu fyrir KFUM og KFUK og KSH árið 2006. Hann hefur starfað við Lindakirkju í tæpa tvo áratugi og tekið að sér fjölbreytt ábyrgðar- og trúnaðarstörf innan kirkjunnar, auk þátttöku í starfi Hins íslenska Biblíufélags, sumarbúða KFUM og KFUK og Minningarsjóðs Bryndísar Klöru.

Hann er giftur Ásdísi Björnsdóttur, enskukennara, og eiga þau þrjú börn, Nóa Pétur, Dagmar Eddu og Signýju Náð.