Stefnuleysi hefur ráðið ríkjum hjá menntamálayfirvöldum á þessari öld að sögn Karls Frímannssonar, skólameistara Menntaskólans á Akureyri.
Karl var óspar á gagnrýni í garð stjórnvalda þegar hann ávarpaði stúdenta við brautskráningu þeirra á þjóðhátíðardaginn.
„Guðmundur Ingi [Kristinsson] sagði þegar hann var ráðherra fyrir stuttu að framhaldsskólastigið væri týnda skólastigið, en ég benti á það í ræðunni að ef einhver hefur týnt því skólastigi þá er það ráðherra og ráðuneytið,“ segir Karl í samtali við mbl.is.
Fyrst var greint frá ræðu skólameistarans á Akureyri.net.
Vanrækta skólastigið
Hann segir framhaldsskólastigið frekar vanrækt en týnt. Fjárveitingar séu af skornum skammti.
„Nú er ráðuneytið farið að stíga það skref að gera skólum að greiða niður uppsafnaðan halla og þetta er svo öfugsnúið; við erum búin að mennta fólk fyrir þetta fjármagn en samt biðja þau okkur að greiða til baka því það er ekki samkvæmt reglunum,“ segir Karl.
„Okkur er gert að þjónusta nemendur enn frekar en gert hefur verið, koma til móts við einstaklingsþarfir og kenna vaxandi fjölda nemenda með íslensku sem annað móðurmál. Það gefur augaleið að lægri fjárframlög og krafa um aukna þjónustu fara ekki saman. Vilji okkar er að fara vel með opinbert fé en þrátt fyrir töluverðar hagræðingaraðgerðir á undanförnum árum duga fjárframlög ekki fyrir grunnþjónustu, hvað þá leiðréttingu á uppsöfnuðum halla.“
Hann segir enga forystu vera að finna hjá menntamálayfirvöldum.
„Það er aðeins eftirlit með fjármálum en ekki inntaki náms, námskrám, kröfum á stúdentsprófi og hvernig þau próf eru sett saman. Skólar geta ákveðið þetta upp á eigin spýtur og þurfa ekki að fara eftir neinum fyrirmælum eða reglum.“
Hæfni nemenda mikið breyst
Þá segir hann hæfni nemenda sem komi úr grunnskólum hafa breyst mjög hratt.
„PISA-niðurstöðurnar segja okkur allt um þetta: Læsi fer hrakandi, orðaforði fer minnkandi, málskilningur minnkandi, krakkar lesa minna, afla sér síður upplýsinga sjálfir og skilja minna það sem verið er að segja.“
Hann tekur það fram að gagnrýnin beinist ekki að börnunum sjálfum. Fullorðið fólk sem stendur vaktina verði að ná taumhaldi á ástandinu.
Menntamálayfirvöld lyfti varla litla fingri.
Ekkert markvert gert fyrir framhaldsskóla
Hann segir Ingu Sæland, nýjasta ráðherra málaflokksins, ekkert markvert hafa gert í málefnum framhaldsskólanna eftir að hún kom í ráðuneytið.
„Svo ég vitni nú í hana sjálfa. Hún sagðist vera amma sem ætlaði að stýra skútunni í höfn, en hún þarf að rata um höfin áður en hún gerir það,“ segir Karl.
Stefna hennar sé sem rifið segl.
Menntaskólinn á Akureyri lauk í síðustu viku innritun nemenda fyrir komandi skólaár. Karl segir aðsóknina hafa verið óvenju mikla.
„Við tókum inn alla sem við mögulega gátum miðað við forsendur fjárlaga.“
