Árni M. Mathiesen, fyrrverandi stjórnarformaður Betri samgangna, ráðherra og þingmaður, segir enga þörf á að fækka akreinum á Suðurlandsbraut vegna Borgarlínunnar, hægt sé að útfæra skipulag þannig að ekki verði þrengt að bílaumferð á þessum kafla.
„Samgöngusáttmálinn gengur út á samstarf sveitarfélaganna, annars vegna innbyrðis, og hins vegar við ríkið, um að bæta samgöngur á höfuðborgarsvæðinu með því að bllanda saman stofnvegaframkvæmdum og almenningssamgöngum og það sem kallað er virkir ferðamátar,“
segir Árni í viðtali við Ólaf Stephensen, framkvæmdastjóra Félags atvinnurekenda í hlaðvarpsþættinum Kaffikróknum. Betri samgöngur eru félag sem sett var á fót til að hrinda samgöngusáttmálanum í framkvæmd og Árni var stjórnarformaður félagsins árin 2020-2024 og gjörþekkir því málefnið.
Segir nægt pláss á Suðurlandsbraut
„Ég held ekkert um það, ég bara veit það. Það eru mörg ár síðan ég sagði í fjölmiðlum að vegna samgöngusáttmálans eða Borgarlínu væri engin þörf á að fækka akreinum á Suðurlandsbraut. Það er nægt pláss þar,“
segir Árni þegar Ólafur ræðir gagnrýni fyrirtækja við Suðurlandsbraut og í Múlahverfi á deiliskipulag Borgarlínu um Suðurlandsbraut og spyr Árna hvort hann haldi að hægt hefði verið að útfæra skipulagið öðruvísi.
Árni rifjar upp þegar rætt var um að ný Þjóðarhöll yrði byggð í Laugardal neðan við Suðurlandsbraut hafi þáverandi borgarstjóri sagt að þjóðarhöllin yrði byggð þannig að hægt yrði að ganga af annarri eða þriðju hæð hallarinnar beint inn og út á Borgarlínustöð. Þar hafi því ekki miðlæg borgarlína verið höfð í huga, heldur myndi hún liggja norðan megin götunnar.
Borgarlínan verði að taka tillit til aðstæðna í gróinni borg
Árni segir að taka verði tillit til aðstæðna og að Borgarlínan geti ekki verið miðlæg á öllum götum gróinnar borgar.
„Borgir voru ekki hannaðar, skipulagðar og byggðar til að vera með miðlæga borgarlínu. Sums staðar verður hún að vera í kantinum og þegar þú ferð síðan að horfa á almenningssamgöngurnar í heild, þá er alveg augljóst að Borgarlínan getur ekki verið annað en mósaík af ýmsum kostum, miðlægri Borgarlínu og hliðstæðri og þegar hún tengist við almenna strætókerfið ertu kominn með enn aðra útfærslu. Þegar þú ert kominn út í raunveruleikann verður að hafa sveigjanleika til að taka tillit til aðstæðna og þú mátt ekki láta hugmyndafræði einhvers grenjandi minnihluta ráða því hvernig niðurstöðurnar verða.“
Þegar kemur að bílum og bílaumferð segir Árni Reykjavíkurborg hafa tekið almenningssamgönguþáttinn út úr sem „merkisberandi“ þátt og að innan borgarstjórnarmeirihlutans sé unnið að því að leggja steina í götu bílaumferðar.
„Borgin hefur kosið að gera þetta að merkisberandi þætti samgöngusáttmálans, þótt það sé mjög langt frá því að sáttmálinn sé á kostnað bílasamgangna eða stofnveganna, hvorki fjárhagslega né þess sem er fyrirséð að séu áhrifin af sáttmálanum. Það er svo langt frá því að það sé gert ráð fyrir því að bíllinn, eða samgöngur með bílum muni minnka. Þær munu ef vel tekst til ekki aukast eins mikið eins og þær hefðu annars gert, en aukast samt. Það er algjörlega augljóst.“
Segir suma borgarfulltrúa nota völd sín þegar kemur að samgöngusáttmálanum
Ólafur spyr hvort margt í sáttmálanum hafi ekki tafist og Árni játar því.
„Það er engin spurning um það og það kemur til af því að undirbúningur var sennilega ekki nægur þegar af stað var haldið og sérstaklega voru kostnaðaráætlanir ófullkomnar. Og það leiðir til þess að þegar sáttmálinn er endurskoðaður þá frestast framkvæmdir sem annars hefðu átt að vera fyrr á tímabilinu. En svo er líka og maður skynjar mjög sterkt að þeir aðilar sem eru um þetta að véla hafa mjög mismunandi skoðanir og sumir þeirra hafa ekkert hikað við að beita sínum kröftum og völdum til þess að halda aftur af því sem þeim líkar verr við og reyna síðan að ýta áfram því sem þeim líkar vel við.“
Segir Árni þar um að ræða suma borgarfulltrúa sem eru innan núverandi meirihluta.
„Það er kannski líka vandi að þegar eru margir flokkar með svipaðar skoðanir eru þeir að keppa innbyrðis og yfirbjóða hver annan hvað þeir geti verið í mikilli andstöðu við bílinn og hvað þeir geti lagt mikið af steinum í götu bílsins, en þetta á ekki við um alla.“
