Eftir ítarlega Rannsókn heldur breska dagblaðið The Telegraph, því fram að fjöldi samtaka sem hafa það markmið að gera almenning jákvæðari gagnvart auknum straumi innflytjenda og hælisleitenda hafi skipulega og markvisst haft afskipti af sjónvarpsefni, fréttaflutningi og afþreyingarefni í Bretlandi.
Samkvæmt rannsókninni hafi markmiðið verið að breyta viðhorfum almennings til innflytjenda með markvissri notkun fjölmiðla og afþreyingarefnis.
Meðal þess sem nefnt er eru samskipti við framleiðendur barnaefnis hjá BBC, ráðgjöf við handritshöfunda sjónvarpsþátta, fjölmiðlaþjálfun talsmanna og samstarf við fréttamenn um umfjöllun um hælisleitendur.
Segjast hafa haft áhrif á barnaþátt BBC
Í rannsókn Telegraph er sérstaklega fjallað um góðgerðarsamtökin Heard, sem voru stofnuð árið 2021 og hafa samkvæmt blaðinu fengið meira en 4,5 milljónir punda í styrki frá ýmsum sjóðum.
Markmið samtakanna er að hafa áhrif á viðhorf almennings, samfélagsleg viðmið og stefnumótun. Í kynningargögnum þeirra kemur fram að fulltrúar samtakanna hafi átt fund með framleiðendum barnaþáttanna Pickle Storm, sem sýndir eru á CBBC (barnastöð BBC) og ætlaðir börnum um sjö ára aldur.
Þar segir að markmiðið hafi verið að hafa áhrif á hvernig fjallað væri um innflytjendamál í barnaefni og að „ráðgjöfin“ hafi nýst við gerð annarrar þáttaraðar sem kom út árið 2025.
Einnig kemur fram að samtökin hafi staðið að því að skipuleggja og samræma umfjöllun margra mismunandi fjölmiðla vegna stefnu breskra stjórnvalda um brottvísanir til Rúanda
Þættirnir fjalla um unga geimveru sem flýr ofsóknir á heimaplánetu sinni og fær hæli í breskum bæ, þar sem fjölskylda hennar þarf að aðlagast nýju samfélagi. Samkvæmt The Telegraph tóku framleiðendur þáttanna og starfsmaður úr barnadeild BBC þátt í fjarfundi með fulltrúum Heard.
BBC hafnar því hins vegar að samtökin hafi haft ritstjórnarvald yfir þáttunum. Stofnunin segir eðlilegt að leita álits sérfræðinga við gerð efnis, en að ritstjórnarákvarðanir séu ávallt í höndum BBC.
Unnu einnig með handritshöfundum Coronation Street
Í rannsókninni kemur einnig fram að Heard hafi árið 2022 átt fund með handritshöfundum sápuóperunnar Coronation Street.
Samtökin segja sjálf að fundurinn hafi orðið til þess að persónan Daryan, ungur íraskur hælisleitandi, varð hluti af söguþræði þáttanna. Í söguþræðinum verður Daryan fyrir árás af hálfu hægrisinnaðra öfgamanna sem eru jafnframt andvígir múslimum og reyna að afla sér fylgis meðal ungra hvítra Breta.
ITV staðfestir að samráð hafi átt sér stað en segir að hugmyndin að persónunni hafi verið rædd áður en ráðgjöf Heard hófst.
Segjast hafa komið fréttum á framfæri hjá BBC
Önnur samtök sem nefnd eru í rannsókninni eru Imix, sem samkvæmt eigin lýsingu vinna að því að efla stuðning almennings við innflytjendur með því að hafa áhrif á opinbera umræðu.
Í gögnum samtakanna kemur fram að þau hafi átt í samstarfi við fréttamenn og fjölmiðla um fjölda frétta og viðtala. Þar eru meðal annars nefndar frétt BBC um flóttafólk sem fann nýtt heimili í Bretlandi og grein í The Independent um samkynhneigða flóttamenn frá Afríku.
Pop Change hefur það að markmiði að hafa áhrif á hvernig almenningur hugsi og tali um innflytjendur með því að taka þátt í að móta dægurmenningu
Einnig kemur fram að samtökin hafi staðið að því að skipuleggja og samræma umfjöllun margra mismunandi fjölmiðla vegna stefnu breskra stjórnvalda um brottvísanir til Rúanda.
Einnig útveguðu samtökin hælisleitendur í viðtöl í kjölfar óeirða árið 2024.
Þau segja jafnframt að unnið hafi verið með fréttamönnum BBC að umfjöllun um þjónustu við innflytjendur sem lokaði vegna óeirðanna. BBC segir að allar fréttahugmyndir fari í gegnum hefðbundið ritstjórnarferli og að allar ákvarðanir um birtingu séu teknar af ritstjórum stofnunarinnar.
Milljónir punda í styrki
The Telegraph segir að þessar herferðir hafi notið fjárstuðnings frá fjölda sjóða og samtaka.
Þar eru meðal annars nefnd:
Arts Council England
National Lottery
Comic Relief
Esmée Fairbairn Foundation
Paul Hamlyn Foundation
Open Society Foundations, sem stofnað var af George Soros
Önnur samtök sem nefnd eru til sögunnar eru Counterpoint Arts. Í rannsókninni kemur fram að samtökin hafi fengið meira en 400 þúsund pund frá Arts Council England á síðustu fimm árum. Samtökin vinna meðal annars að verkefni sem kallast Pop Change og hefur það að markmiði að hafa áhrif á hvernig almenningur hugsi og tali um innflytjendur með því að taka þátt í að móta dægurmenningu.
Samkvæmt rannsókninni hafa samtökin meðal annars unnið með BAFTA að fræðslu fyrir unga kvikmyndagerðarmenn og staðið fyrir fundum með fulltrúum BBC Films og BBC Radio Drama.
Þjálfun fyrir fjölmiðlaviðtöl
The Telegraph fjallar einnig um sérstaka fjölmiðlaþjálfun sem ýmis samtök bjóða talsmönnum sem styðja fjölgun innflytjenda.
Þar er meðal annars vísað til samtakanna Neon, sem segjast hafa komið yfir 11 þúsund viðmælendum sem þau hafa þjálfað í sjónvarps- og útvarpsþætti, meðal annars á BBC og ITV.
Í leiðbeiningum samtakanna er meðal annars lagt til að notast sé frekar við orðalag á borð við „fólk sem hefur komið til að leita öryggis og byggja upp nýtt líf“ í stað orðsins flóttamenn.
Þá eru talsmenn hvattir til að leggja áherslu á að mannúðlegt innflytjendakerfi sé jafn mikilvægt og breska heilbrigðiskerfið NHS.
Samtökin hafna gagnrýninni
Heard hafnar því að samtökin séu að stunda pólitíska hagsmunagæslu.
Í yfirlýsingu segir að markmið þeirra sé að hjálpa fólki með reynslu af innflytjendamálum að segja sögu sína og stuðla að sanngjarnari og nákvæmari umfjöllun í fjölmiðlum.
Imix segir að starfsemi þeirra snúist um að miðla raunverulegri reynslu innflytjenda, hlusta á áhyggjur almennings og stuðla að „virðingu og mannúð“ í umræðunni.
Samtökin telja jafnframt að óeirðir og samfélagsleg spenna sýni hversu skaðleg neikvæð orðræða um innflytjendur geti verið og segja að markmið þeirra sé að draga úr slíkri þróun.
BBC leggur áherslu á sjálfstæði ritstjórna
BBC hafnar því að utanaðkomandi samtök hafi áhrif á ákvarðanir ritstjórna stöðvarinnar.
Í yfirlýsingu stofnunarinnar segir að algengt sé að leita álits sérfræðinga og félagasamtaka við gerð frétta og dagskrárefnis, en að endanlegar ákvarðanir séu alltaf í höndum BBC sem starfi samkvæmt ströngum reglum um óhlutdrægni.
