Íbúar neyðarskýlis Rauða krossins í Borgartúni voru fluttir á brott þaðan í morgun.
Umsókn þeirra um alþjóðlega vernd var hafnað en ekki hefur verið hægt að vísa þeim úr landi, af ýmsum orsökum.
Dómsmálaráðuneytið endurnýjaði ekki samning við Rauða krossinn um húsnæðisstuðning við fólkið og neyðarskýlinu var því lokað.
Fólk sem hefur verið synjað um alþjóðlega vernd hér á landi
Samningur dómsmálaráðuneytisins og Rauða krossins um rekstur neyðarskýlisins rann út um mánaðamótin.
Jón Brynjar Birgisson, sviðsstjóri aðgerðasviðs Rauða krossins, segir samningnum hafa verið komið á fyrir um þremur árum í kjölfar lagasetningar um að fólk, sem neitaði samstarfi við stjórnvöld eftir að hafa verið synjað um alþjóðlega vernd, yrði svipt rétti á opinberri þjónustu.
„Og það sem blasti við á þeim tímapunkti var að hópur fólks yrði bara beinlínis settur á götuna. Komast ekki heim til sín og eiga ekki í nokkur nein hús að venda.“
Jón Brynjar segir að Rauði krossinn hafi þrýst á stjórnvöld um að fólkið fengi að njóta sömu réttinda og fólk sem býr við heimilisleysi hér á landi.
Dómsmálaráðuneytið gerði samning við Rauða krossinn um rekstur neyðarskýlisins í Borgartúni.
Boðið upp á sambærilegt úrræði á vegum ráðuneytisins
Við lokun neyðarskýlisins í morgun var íbúum boðið upp á sambærilega þjónustu í húsnæði á vegum dómsmálaráðuneytisins í Hafnarfirði.
Jón Brynjar segist fagna því að stjórnvöld viðurkenni áfram að fólkið njóti sömu réttinda og aðrir sem glíma við heimilisleysi.
Rauði krossinn hefur nú hætt allri húsnæðisþjónustu við flóttafólk á Íslandi.
Hópur fólks kom saman við lokun neyðarskýlisins í morgun.
Samtökin No Borders segjast hafa áhyggjur af örlögum fólksins og telja lokunina tengjast fyrirhugaðri brottfararstöð stjórnvalda.
Jón Brynjar telur svo einnig vera en segir að sá hópur sem hafi sótt þjónustu neyðarskýlisins falli þó ekki endilega undir þann hóp sem muni dvelja í brottfararstöð.
„Því þessi hópur er ekki umsækjendur um alþjóðlega vernd lengur. Heldur fólk sem hefur lokið allri slíkri þjónustu og hefur þá ekki verið brottvísað af ýmsum ástæðum. Það geta verið aðstæður í heimalandi, lönd sem Ísland getur ekki brottvísað fólki til, skortur á skilríkjum og ýmislegt sem gerir það að verkum að þau í rauninni sitja hér föst.“
