Vísindamenn við Oxford-háskóla í Bretlandi vinna hörðum höndum að því að þróa nýtt bóluefni við ebólu. Það gæti verið tilbúið fyrir klínískar rannsóknir innan tveggja til þriggja mánaða.
Ebólufaraldur braust út í Lýðstjórnarlýðveldinu Kongó í lok apríl. 177 hafa látist og grunur er um 750 smit. Flest hafa greinst í Kongó en nokkur hafa komið upp í nágrannaríkinu Úganda.
Fimm afbrigði eru til af ebólu en þrjú þeirra hafa valdið faröldrum: ebóluveira, súdanveira og bundibugyoveira. Faraldurinn sem er í gangi núna er vegna sjaldgæfa afbrigðisins Bundibugyo-veiru. Það greindist fyrst í faraldri í Bundibugyo-héraði í Úganda árið 2007.
Afbrigðið hefur ekki sést í rúman áratug og það eru hvorki til lyf né bóluefni gegn því. Dánartíðni afbrigðisins er 30-50%.
Bóluefnið á enn eftir að fara í gegnum rannsóknir á dýrum og fólki og fyrr en það er gert er ekki öruggt að það virki. Vísindamenn séu hins vegar að vinna eins hratt og þeir geti að þróun bóluefnisins ef faraldurinn skyldi breiðast frekar út og þörf sé á því.
Alþjóðaheilbrigðisstofnunin, WHO, hefur hækkað áhættustig í Kongó vegna faraldursins úr miklu í mjög mikið. Útbreiðslan er slík að stofnunin hefur lýst faraldrinum sem alþjóðlegu neyðarástandi.
Sóttvarnarstofnun Evrópu (ECDC) metur litlar líkur á smiti hjá einstaklingum frá ESB og EES sem búa í eða ferðast til Ituri-héraðs. Í tilkynningu á vef embættis landlæknis segir að mjög litlar líkur séu taldar á smiti hjá fólki sem býr í Evrópusambandinu og á Evrópska efnahagssvæðinu, þar með talið á Íslandi.
Annað bóluefni er einnig í þróun en talið er að það geti tekið allt að níu mánuði að þróa það.
Bóluefni sem er í þróun hjá Oxford-háskóla er þróað með sömu tækni og bóluefnin við COVID-19.
