Skortur á námsgögnum veldur álagi á kennara, segir Björn Gunnlaugsson, skólastjóri Laugarnesskóla.
„Þetta fyrst og fremst veldur bara álagi á kennara, sem þurfa annaðhvort, í besta falli, að vera að uppfæra efni sem er í námsbókum eða finna til nýtt efni, semja jafnvel sjálfir, námsefni og verkefni og í það fer tími sem gæti verið varið í allt annað og betra,“ segir Björn.
Í nýrri skýrslu Þróunarsjóðs námsgagna kemur fram að framlög til þróunar námsgagna eru innan við helmingur þess sem þau voru fyrir tveimur áratugum. Meirihluti kennara notar að miklu eða einhverju leyti námsefni sem búið er til innan hvers skóla, efni sem nýtist þá ekki í skólum annars staðar.
„Það þyrfti hreinlega að setja aftur upp stofnun sem hét í gamla daga Ríkisútgáfa námsbóka. Það var meðvituð pólitísk ákvörðun að leggja þessa stofnun niður og menn héldu kannski að hin ósýnilega hönd markaðarins myndi láta hér rigna kennslubókum yfir okkur. Það raungerðist ekki og námsgagnagerð þarf hreinlega að mínu mati að vera á hendi hins opinbera.“
Tekur tíma frá kennslu
Stór hluti af tíma kennara fer að sögn Björns í að útbúa námsefni í stað þess að sinna einstökum nemendum. Björn segir þó ekki hægt að segja með nákvæmni hve mikill tími fer í að útbúa námsefni.
„Stutta svarið er náttúrlega bara of mikill tími, en það er einstaklingsbundið. Sumir kennarar geta verið mjög fljótir að rigga upp flottu verkefni. Aðrir leggja meiri tíma í það. Ég held að það sé snúið að finna eina prósentutölu af vinnuvikunni sem fer í þetta. En óneitanlega þá er þetta tími sem væri betur varið í nám og kennslu,“ segir Björn sem telur að hægt væri að nýta tíma og vinnuframlag kennara mun betur.
„Ég væri til í það sem skólastjóri að ég fengi fjármagn til þess að flinkir kennarar í námsefnisgerð gætu varið tíma sínum í þetta og þyrftu þá að kenna aðeins minna á móti. En staðan er því miður ekki sú. Kennarar þurfa bæði að sinna fullri kennslu og í mörgum tilvikum sjá til þess að búa til námsefni.“
Skortur á kennsluefni fyrir erlenda nemendur
Í skýrslunni segir að skortur á námsefni komi helst niður á þeim börnum sem þurfa meiri stuðning. Björn segir þetta ríma við sína reynslu sem skólastjóri.
„Hann er þvert á námsgreinar en það sem við höfum fundið mjög mikið fyrir undanfarin ár er að það hefur verið mjög mikill skortur á námsefni til að kenna íslensku sem annað tungumál. Erlendum nemendum hefur fjölgað hratt á Íslandi á undanförnum árum. Lengi vel var ekkert námsefni til, það hefur reyndar alveg ýmislegt verið að koma til. En þarna vantar virkilega í dag.“
