Ráð­gjafar á­hyggju­fullir og Trump gerði hlé á á­rásum - Vísir

Áhyggjurnar snúa meðal annars að því hve átökin hafa gengið á birgðir af flugskeytum í loftvarnarkerfi Bandaríkjanna og ríkja Mið-Austurlanda. Það á sérstaklega við flugskeyti í Patriot-loftvarnarkerfi, sem eru mikilvæg þegar kemur að því að skjóta niður skotflaugar.

Þessi dýru flugskeyti, sem kosta jafnvel yfir fjórar milljónir dala (504 milljónir króna) stykkið, hafa verið notuð til að skjóta niður ódýra sjálfsprengidróna frá Íran. Ráðgjafar forsetans lýstu einnig yfir áhyggjum af því að stríðið gæti breiðst út enn frekar.

Sjá einnig: Leita til Úkraínu­manna vegna íranskra sjálfsprengidróna

Í frétt New York Times segir að á fundi í Hvíta húsinu á föstudaginn hafi Trump rætt við helstu ráðgjafa sína og ráðherra um það að mögulega auka umfang árása á Íran.

Heimildarmenn miðilsins segja sérstaka áherslu hafa verið lagða á skort á flugskeytum en þrír bandarískir hermenn féllu nýverið þegar írönsk skotflaug komst í gegnum varnir Bandaríkjamanna í Jórdaníu.

Þó árásir hafi ekki verið gerðar í nótt, svo vitað sé, eru Bandaríkjamenn enn með Íran í herkví og koma í veg fyrir að skipum sé siglt þaðan eða þangað. Eitt skip var stöðvað í gær með árás og hermenn fóru þangað um borð.

CNN hefur einnig sagt frá þessum fundi og því að Caine hafi þar sagt Trump að herinn gæti vel aukið umfang árása gegn Íran. Það gæti þó haft miklar afleiðingar og lýsti hann yfir sérstökum áhyggjum af því hve birgðastaða Bandaríkjanna á flugskeytum fyrir Patriot og ýmis önnur hergögn væri lítil.

Viðræður sagðar snúast um stjórn Hormússunds

Eftir fundinn á föstudaginn sagði Trump að bandarískir embættismenn ættu í viðræðum við klerkastjórnina í Íran. Þá gaf hann í skyn að klerkastjórnin virtist hafa meiri áhuga á viðræðum en áður. Enn er þó óljóst hvort einhverjar viðræður eða jafnvel þreifingar hafi farið fram.

Einn heimildarmaður AP fréttaveitunnar, sem er sagður vera embættismaður frá Mið-Austurlöndum og mun þekkja til, segir að bæði Íranir og Bandaríkjamenn vilji aftur vopnahlé. Verið sé að ræða möguleikann á því að Íranir haldi áfram að stjórna Hormússundi, sem þeir gerðu ekki fyrir stríðið, en með færri takmörkunum á skipasiglingar en á undanförnum vikum.

Utanríkisráðherra Íran sagði í morgun að klerkastjórnin ætti í viðræðum við yfirvöld í Óman um það hvernig slíkt myndi ganga fyrir sig.

Fáir höfðu trú á að áætlun Trumps myndi skila árangri

Trump sagði einnig eftir fundinn að mögulega myndu árásirnar halda áfram og að þær yrðu umfangsmeiri. Hann sagði Bandaríkjamenn klára í slaginn. Þeir gætu aukið umfangið til muna með litlum fyrirvara.

Þá sagði Trump einnig að hann hefði ekki áhyggjur af kosningunum í haust.

Fáir, ef einhverjir, sem sátu fundinn á föstudaginn. eru sagðir hafa trú á því að það að auka umfang árása á Íran myndi bera þann árangur sem Trump vonaðist eftir.

NYT hefur eftir heimildarmönnum sínum að fyrir fundinn hafi Trump virst tilbúinn til að skipa hernum að gera umfangsmeiri árásir en á undanförnum dögum hafa Bandaríkjamenn aukið viðbúnað í Mið-Austurlöndum töluvert með því að senda hergögn, hermenn og herflugvélar á svæðið.

Sjá einnig: Ekkert lát á á­rásum Banda­ríkjanna og Íran

Jared Kushner, tengdasonur forsetans og ráðgjafi hans, er sagður hafa lagt til á fundinum að í stað árása myndu Bandaríkjamenn beita viðræðum og efnahagslegum þrýstingi gegn Íran og til lengri tíma.