Troels Lund Poulsen leiðtogi Venstre, sem nú hefur umboð til að mynda ríkisstjórn í Danmörku, tilkynnti í morgun að hann vildi mynda minnihlutastjórn þriggja flokka í borgaralegu blokkinni, þ.e. Venstre, Íhaldsflokksins og Frjálslynda flokksins.
Poulsen sagði við fjölmiðla í morgun að þetta væri besta leiðin til að mynda ríkisstjórn en nú eru hátt í tveir mánuðir frá þingkosningunum. Hann hafi rætt við hina tvo flokkana sem séu til í slaginn. Þeir séu sammála um nokkur stefnumál, meðal annars að lækka gjöld á eldsneyti og að halda þróunaraðstoð í 0,7% af landsframleiðslu. Venstre hafði áður boðað lækkun slíkrar aðstoðar og að peningarnir yrðu notaðir í varnarmál í staðinn.
Þessir flokkar hafa 44 þingmenn en það þarf 90 til að styðja stjórnina. Það þýðir að þessi ríkisstjórn þyrfti ekki aðeins stuðning hinna flokkanna í borgaralegu blokkinni heldur líka frá Moderaterne, flokki Lars Løkke Rasmussen. Poulsen sagðist ekki hafa rætt þetta við Lars Løkke. „Það er kominn tími til að velja pólitískt innihald fram yfir einstaklinga,“ sagði hann. Umboð Poulsen til stjórnarmyndunar rennur út eftir fjóra daga.
Lars Løkke undrandi
Flokkarnir í borgaralegu blokkinni eru jákvæðir fyrir að styðja þessa ríkisstjórn. Lars Løkke Rasmussen sagði eftir að hafa hitt flokksmenn að hann væri undrandi á þessu útspili. „Mér finnst of snemmt fyrir þann sem hefur umboðið að gefast upp á að mynda meirihluta. Við fórum ekki í kosningar til að mynda bláa eða rauða minnihlutastjórn, heldur breiða miðjustjórn. Þetta er tilraunaloftbelgur sem getur ekki flogið.“
Lars Løkke gaf þó ekki skýrt út hvort hann myndi styðja slíka ríkisstjórn eða ekki. Hann heldur fund með Troels Lund Poulsen í kvöld.
