Orri segir eðlilegt að útlendingar séu hátt hlutfall þeirra sem þiggi fjárhagsaðstoð

„Þetta endaði ekki sem byrði á bæjarsjóði en þetta var mikill fjöldi á tímabili,“ segir hann.

Samkvæmt Orra voru hælisleitendur á bilinu 400 til 500 þegar mest var, en eru nú um 100 til 120 talsins. Hann telur núverandi stöðu viðráðanlega, en að fyrri staða hafi verið orðin of erfið.

Erlendir ríkisborgarar stór hluti þeirra sem þiggja aðstoð

Frosti bendir á að hlutfall erlendra ríkisborgara sem þiggja fjárhagsaðstoð sé hátt í Reykjavík, þar sem tveir þriðju þeirra sem þiggja fjárhagsaðstoð séu erlendir ríkisborgarar, og spyr hvernig þeim málum sé háttað í Hafnarfirði. Orri segir hlutföllin þar vera svipuð en leggur þó áherslu á að skýringar séu á bak við tölurnar.

Hann segir að flestir innflytjendur komi til landsins til að vinna og bæta líf sitt, en starfi gjarnan í atvinnugreinum sem sveiflast mikið, svo sem byggingariðnaði og ferðaþjónustu. Þegar samdráttur verður í þessum greinum missa þeir frekar vinnuna og fari því oftar á bætur.

„Þetta er í raun eðlilegt að hlutfallið sé hærra þar sem þeir eru í þessum störfum,“ útskýrir Orri.

Vill aðgreina umræðu um innflytjendur og hælisleitendur

Í viðtalinu segir Orri mikilvægt að aðgreina umræðu um innflytjendur annars vegar og hælisleitendur hins vegar. Hann telur að umræðan ruglist oft saman og verði því ómarkviss.

Hann leggur jafnframt áherslu á að nauðsynlegt sé fyrir íslenskt samfélag að taka á móti fólki að utan til að halda uppi vexti og atvinnulífi.

„Við erum gott samfélag sem fólk vill taka þátt í,“ segir hann.

Orri segir þó mikilvægt að innflytjendur aðlagist samfélaginu og verði hluti af því. Hann varar við því að annars myndist hópar sem standi utan samfélagsins. Hann telur að sérstaklega þurfi að leggja áherslu á að börn sem flytja til landsins eða fæðast hér verði hluti af samfélaginu sem fyrst.

„Þá verða þau mjög hratt Íslendingar, bara með öðruvísi ættir,“ segir hann.

Bendir á Japan sem dæmi 

Í umræðunni er einnig vísað til þróunar í Japan þar sem fólksfækkun og öldrun samfélagsins hafa skapað áskoranir. Orri segir að slíkt sýni mikilvægi þess að samfélög fái inn nýtt fólk. Að hans mati sé hætta á stöðnun eigi sér stað ef ekki sé tekið á móti innflytjendum, en jafnframt þurfi að huga að aðlögun og jafnvægi.

Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.