Setja bókamerki
Neyðarskýli Rauða krossins í Borgartúni var lokað í morgun. Fólkið sem þar hefur dvalið hefur verið flutt í Bæjarhraun í Hafnarfirði, í húsnæði á vegum stoðdeildar ríkislögreglustjóra.
Gylfi Þór Þorsteinsson, sviðsstjóri fjáröflunar- og kynningarsviðs Rauða krossins, staðfestir þetta við mbl.is. Samningur Rauða krossins við dómsmálaráðuneytið sé runninn út og verkefnið færist því frá Rauða krossinum til ríkislögreglustjóra.
Freyr Gígja Gunnarsson, upplýsingafulltrúi dómsmálaráðuneytisins, staðfestir að fólkið verði flutt í húsnæði á vegum stoðdeildar ríkislögreglustjóra.
Þorbjörg Sigríður Gunnlaugsdóttir dómsmálaráðherra mælti fyrir frumvarpi til laga um brottfararstöð á þingi í nóvember. Samtökin No Borders Iceland hafa gert við þetta alvarlegar athugasemdir og krefjast þess að frumvarpið verði dregið til baka í heild sinni.
Þá hefur Barna- og fjölskyldustofa lýst yfir áhyggjum af frelsissviptingu barna og að vist í brottfararstöð geti haft skaðleg langtímaáhrif á líf barns.
Verði aðeins beitt sem síðasta úrræði
Frumvarp dómsmálaráðherra um brottfararstöð felur það í sér að horfið verður frá þeirri framkvæmd að vista dvalarleyfislausa útlendinga, sem ekki sýna samstarfsvilja, í fangelsi á grundvelli gæsluvarðhaldsheimilda.
Verði frumvarpið að lögum verður heimilt, að ákveðnum skilyrðum uppfylltum, að vista útlending á brottfararstöð vegna ákvörðunar um að hann skuli yfirgefa landið eða þegar mál sem getur leitt til slíkrar ákvörðunar er til meðferðar.
Í tilkynningu frá dómsmálaráðuneytinu kom fram að Ísland væri eina ríki Schengen-svæðisins sem ekki hefði komið á fót slíkri stöð.
Ítrekað er í frumvarpinu að vistun á brottfararstöð verði aðeins beitt sem síðasta úrræði þegar fullnægjandi mat hefur farið fram um að vægara úrræði muni ekki skila árangri. Jafnframt eru ströng skilyrði fyrir vistun barna á slíkum stöðvum, auk þess verði þau aldrei vistuð þar lengur en í 9 daga. Þá er skýrt kveðið á um að fylgdarlaus börn verði ekki vistuð á slíkri stöð.
Ekkert sem ekki hafi verið hægt að ráða við
Aðspurður segir Gylfi fáa hafa dvalið í skýlinu síðan það var opnað árið 2023. Á þeim tíma hafi engin atvik eða ágreiningur komið upp sem ekki hafi verið hægt að ráða við.
Þá ítrekar hann að hópurinn sem dvalið hefur í skýlinu sé hópur sem hafi fengið neitun við alþjóðlegri vernd hér á landi, ekki hópur sem hafi brotið af sér.
