„Hvalveiðar eru eitthvað sem öll ríki heims, utan við þrjú, fordæma og mér finnst mjög sorglegt að við ætlum að vera ein af þessum þremur sem halda áfram vegna þess að einn maður ákveður að hann vilji það. Það hlýtur að vera að ríkisstjórn Íslands hafi meiri völd heldur en Kristján Loftsson.“
Þetta segir Valgerður Árnadóttir, formaður Hvalavina - Verndar hafsins. Samtökin skipulögðu mótmæli gegn hvalveiðum við Reykjavíkurhöfn í dag, ásamt Ungum umhverfissinnum, Náttúruverndarsamtökum Íslands, Samtökum grænkera og SEED Iceland.
Formaður Hvalavina segir ekki forsvaranlegt að drepa dýr á ómannúðlegan máta eins og gert er við hvalveiðar. Dauðastríðið geti tekið margar klukkustundir.
„Þess vegna er þetta bara brot á okkar lögum og ég tel að ríkisstjórnin beri ábyrgð á að stöðva þetta. Það er þeirra hlutverk,“ segir Valgerður.
Á fimmtudag kom aðgerðasinninn Hólmsteinn Harðarson sér fyrir í mastri Hvals 9 til að koma í veg fyrir að skipið sigldi út til veiða. Skipið lagði af stað með Hólmstein um borð eftir að hann var skráður sem farþegi án hans samþykkis. Hann fór ekki niður úr mastrinu fyrr en í Hvalfirði.
Fréttastofa náði tali af honum fyrir mótmælin í dag.
„Ég er búinn að skoða mína hegðun í þessu og ég sé að ég gerði einhver mistök. Þegar þeir koma til baka þá langar mig að tala við ákveðna skipverja sem eru þarna og taka ábyrgð á því sem ég gerði rangt,“ segir Hólmsteinn og vísar til þess að athæfi hans um borð í hvalveiðiskipinu hafi skapað varhugaverðar aðstæður.
Á tímapunkti kom til lítils háttar átaka á milli hans og skipverja þegar Hólmsteinn var að reyna að koma sér fyrir í mastri hvalveiðiskipsins. Hann segir fréttastofu að hann ætli að biðja ákveðna skipverja afsökunar vegna síns þáttar í því.
Valgerður segist skilja hvers vegna fólk grípi til slíkra mótmæla, þótt hún og Hvalavinir hafi ekki gert það.
„Þetta er viss örvænting sem grípur um sig þegar manni finnst maður ekki geta gert neitt, þegar manni finnst ekki á mann hlustað. Ég er sjálf búin að vera í þessari baráttu í átta ár og búin að reyna allar lagalegar og friðsamar leiðir,“ segir Valgerður.
„Mér þótti mikilvægt að ég, og við í Hvalavinum, myndum styðja Hólmstein þegar hann ákvað að gera þetta. Við vorum til staðar og tókum á móti honum þegar hann kom niður og það var bara í fyrsta sinn sem ég hitti Hólmstein.“
